Karrager Rummeniggeyə cavab verdi
Almaniya futbolunun əfsanəsi Karl-Haynts Rummeniggenin Nik Voltemade haqda dediyi sözlər gündəm olmaqda davam edir.
"Football-plus.az" xəbər verir ki, “Bavariya”da Müşahidə Şurasının üzvü olan Rummenigge bir neçə gün əvvəl “”Ştutqart”ı təbrik edirəm. Çünki sonda Voltemadeyə görə bu qədər böyük məbləğ ödəməyə razılıq verən axmağı tapmağa müvəffəq oldular” açıqlamasını vermişdi.
Xatırladaq ki, “Nyukasl” bu yay almaniyalı forvardı “Ştutqart”dan “85+5” milyon avroya transfer edib. 23 yaşlı futbolçu son 3 rəsmi matçın hər birində fərqlənməyi bacarıb və İngiltərə karyerasında 7 oyuna artıq 4 qol vurub.
Daha öncə “Nyukasl”ın baş məşqçisi Eddi Hau və bu klubun vingeri Entoni Qordon Rummeniggeyə cavab vermişdi. Onların hər ikisi bu ifadənin yanlış olduğunu və Voltemadenin özünü yaxşı tərəfdən göstərdiyini bildirmişdi. Bu dəfə isə müzakirələrə Ceymi Karrager qoşulub. “Liverpul”un əfsanələrindən olan və hazırda futbol eksperti kimi kimi fəaliyyət göstərən Karrager bunları deyib:
“Voltemadeni çox bəyənirəm. Rummeniggenin sözlərini bir neçə gün öncə oxudum. Düzünü desəm, bu sözlər məni qəzəbləndirdi. Halbuki mən heç “Nyukasl” azarkeşi deyiləm. Bu hörmətsizlikdi. Özü də nəzərə alaq ki, bu ifadəni almaniyalı hücumçu barədə işlədib. Almaniyada həmin gün bütün qəzetlər və saytlar yalnız bundan danışırdı. Halbuki orda Voltemadenin qohumları yaşayır. Bu sözü mənim kimi heç bir kluba bağlı olmayan futbol eksperti söyləsəydi, anlamaq olardı. Amma Rumennigge klub rəsmisidi. Özü də “Bavariya” kimi möhtəşəm bir klubun rəsmisi. Bu, əsl hörmətsizlikdi. Ümid edirəm ki, Voltemade onu bu sözlərinə görə peşman edəcək. Onun İngiltərə karyerasına necə uğurlu başladığını nəzər alsaq, sonda məhz belə də olacaq”.
