“Bavariya”nın dünyanın dörd bir yanında yaşayan azarkeşləri son günlər ikili hisslərin ağuşuna düşüb. Əlbəttə, komandanın ardıcıl 11-ci çempionluğu onlara böyük sevinc bəxş edib. Amma klub rəhbərliyindəki şok istefalar istər-istəməz çempionluq şadyanalığına müəyyən dərəcə kölgə salır.


“Football-plus.az” xəbər verir ki, yerli mənbələr komanda hələ bundesliqanın sonuncu turunun “Köln” ilə oyununa çıxmazdan bir neçə gün əvvəl Oliver Kanla Hasan Salihamiciçin vəzifəsindən ayrılacağını xəbər vermişdi. Bu iddia rəsmi təsdiqini mayın 27-də tapıb. Həmin gün Münhen klubunun mətbuat xidməti Kanın İdarə Heyətinin sədri və baş direktor, Salihamiciçin isə idman direktoru postunu tərk etməsi ilə bağlı məlumat yayıb. Artıq Kanın yerinə Yan-Kristian Drizen təyinat alıb. 55 yaşlı mütəxəssis son 10 ildə klubun İdarə Heyətinin sədr müavini vəzifəsini icra edib. Hələ ki Salihamiciçin xələfi müəyyənləşməyib.

Yerli mənbələr komandanın artıq başa çatan mövsümün həlledici mərhələsində qarşıya qoyulan hədəflərdən böyük ölçüdə uzaq düşməsi üzündən funksionerlərin fəaliyyətinin rəhbərlikdə narazılıq doğurduğunu vurğulayır. Zarafat deyil, Almaniya kubokunda mübarizəni 1/4 finalda “Frayburq”a uduzmaqla (1:2) dayandıran “Bavariya” Çempionlar Liqasında (ÇL) da bu mərhələyə qədər irəliləmiş və “Mançester Siti”yə məğlub olmuşdu (0:3, 1:1). Bilindiyi kimi, komandanın bütün turnirlərdə qeyri-sabit çıxışı Yulian Naqelsmannın baş məşqçi vəzifəsindən istefaya göndərilməsini labüd etmişdi. Amma nəticələr gənc mütəxəssisin yerini tutan təcrübəli Tomas Tuxelin təyinatından sonra da göz qamaşdırmırdı. Fakt budu ki, bundesliqada sonuncu tur ərəfəsində çempionluq şansı münhenlilərin əlində deyildi. “Borussiya” evdə “Maynts-05”ə qalib gələcəyi halda “Bavariya” son 12 ildə ilk dəfə çempion ola bilməyəcəkdi. Bu səbəbdən son transferlərə görə də az tənqid olunmayan Kanla Salihamiciçin aqibəti hələ “Köln”ə qarşı matçdan bir neçə gün əvvəl müəyyənləşmişdi.

Görün, aradakı münasibətlərdə nə dərəcədə soyuqluq yaranıbmış ki, Kana komanda ilə birgə Kölnə getmək qadağan edilib. “Bavariya”nın və dünya futbolunun tarixinə ən güclü qapıçılardan biri kimi düşən 53 yaşlı funksionerin sosial şəbəkə hesabına yazdıqlarını olduğu kimi nəzərinizə çatdırırıq: “İnanılmazdı! Uşaqları təbrik edirəm! Mən ki demişdim! Həmişə sona qədər mübarizə aparmalı və təslim olmamalısan. Sizinlə fəxr edirəm! Bu çempionluğu sizinlə birgə bayram etmək istərdim, təəssüf ki, klubun qadağasına görə bunu edə bilmirəm... ”

Son günlər baş verən hadisələr sırasında Karl-Haynts Rummeniggenin kluba qayıtması da vurğulanmalıdı. O, yaxın keçmişdə - 2002-21-ci illərdə baş direktor postunu tutduğu “Bavariya”nın Müşahidə Şurasına daxil olub. Maraq üçün komandanın 67 yaşlı funksionerin fəaliyyəti dövründə 14 dəfə bundesliqanın, 10 dəfə Almaniya kubokunun, 2 dəfə isə ÇL-in qalibi olduğunu da yada salaq. Rummenigge heyətin planlaşdırılması və transferlər sahəsində kömək edəcəyi kluba dönüşünü belə dəyərləndirib: “Müşahidə Şurasına mənə göstərdiyi etimada görə təşəkkür edirəm. “Bavariya” rəhbərliyinə böyük məmnunluqla kömək edəcəyəm. İndiyədək bu klubla çox uğuru bayram etmək şansım olub, buna görə özümü bəxtəvər sayıram. Müşahidə Şurasının dəvətini böyük sevinclə qəbul etdim”.

Klubun prezidenti Herbert Hayner isə təyinata belə münasibət bildirib: “Rummeniggenin Müşahidə Şurasının üzvü olmasına sevinirik. O, klubumuzun tarixinin böyük fiqurlarından biridi. Rummeniggenin komandamızla nələr qazandığı hamıya bəllidi. Onun təcrübəsi, biliyi və beynəlxalq əlaqələri “Bavariya”nın bundan sonrakı uğurlarının təmin olunmasında bizə çox kömək edəcək”.