Lotar Matteusun növbəti dəfə ''Bavariya''nı tənqid etməsi əfsanələr arasında yenə qalmaqalın yaşanmasına səbəb olub.

Uzun müddətdi həm jurnalist, həm də ''Skay Sports'' kanalında futbol şərhçisi kimi çalışan Matteus münhenlilərin müqavilə müddəti mövsümün sonunda başa çatacaq Robert Levandovskiyə hələ də yeni müqavilə təklif etməmələrini sərt şəkildə tənqid atəşinə tutub. O, bunu Levandovskiyə qarşı hörmətsizlik adlandıraraq əvvəlki rəhbərlik - Karl-Haynts Rummenigge və Uli Hönessin dövründə heç vaxt belə şeylərin olmadığını bildirib. Hazırda ''Bavariya''nın direktorlar şurasının sədri kimi çalışan klubun digər əfsanəsi Oliver Kan sabiq komanda yoldaşına belə cavab verib: ''Lotar karyerasını bitirdikdən sonra heç bir klubu idarə etmədi və idarəçiliyin nə demək olduğunu bilmir.

Təəssüf ki, son dönəmlərdə manşetlərə çıxmaq üçün tez-tez lazımsız sözlər danışır. Klubun daxilindən məlumatı yoxdusa, ona bunnan sonra çox danışmamağı məsləhət görərdim''. 2017-nin yayından bu yana ''Bavariya''nın idman direktoru vəzifəsini icra edən Hasan Salihamiciç isə ''Matteusun söylədikləri bizim vecimizə də deyil'' açıqlamasını verib. Bir müddət öncə ''Bavariya''nın ''Bohum''a 2:4 hesabı ilə məğlub olduğu oyundan sonra da Matteus ilə rəhbərlik arasında söz savaşı yaşanmışdı.