Yığma komandamız bu gün güclü və amansız Fransanın önünə çıxır. Yeni baş məşqçi, bir neçə yeni futbolçu, yeni ruh, bəlkə də yeni hədəflər...

Məsələyə bir qədər nikbin yanaşmaq istəyirəm. Niyə də Fransadan xal almayaq? Bəli-bəli, niyə də yox?! Onlar da futbolçudu, bizimkilər də. Onların da ayağı var, bizimkilərin də. Onların oynadığı komandalar “Real”, “Barselona”, PSJ-di, bizimkilərin “Qarabağ”, “Neftçi”, “Araz-Naxçıvan”. Futbolçular da özlərini Ayxan Abbasova göstərmək üçün əlindən gələni edəcək.

Abbasovun siyahısında yer alan 7 futbolçu müntəzəm ÇL-də oynayır, illərdi Avropa səhnəsində çıxış edirlər. Komandada hansısa itki yoxdu. Rəqibin hücum xəttinin üç əsas futbolçusu yoxdu – Mbappe, Dembele, Due. Mbappenin yerində oynayacaq futbolçu, çox güman, “Liverpul”dan Ekitike olacaq.

Şükür Allaha, bizdə əmin-amanlıqdı. Nə zədəlilərimiz var, nə də cəzalı futbolçumuz. Yəqin ki, qapıda Portuqaliyaya, daha doğrusu Ronaldoya bir neçə il öncə qan udduran Şahruddin Məhəmmədəliyev duracaq. Sol cinahımız da əmin əllərdədi. Elvin Cəfərquliyev də, Toral Bayramov da “ok”di. Mərkəz müdafiəçilərimizin biri Bəhlul olacaq - şübhəsiz. Digəri də ya Rahil Məmmədov olar, ya da Elvin Bədəlov. Amma klub performansına baxsaq, Murad Xaçayev daha ideal seçimdi. Sağ cinahımız narahatdı. Nə Faiq Hacıyev odu, nə də Abbas Hüseynov. Bəlkə də Qismət daha yaxşı variantdı. Amma Ukrayna ilə oyunda o da özünü yaxşı tərəfdən göstərə bilməmişdi. Dayaq zonasında da Abdulax Xaybulayev Ayxan Abbasovun əvəzedilməzi kimi görünür. Yanında da Emin Mahmudov, İsmayıl İbrahimli, Səbuhi Abdullazadə, ya da elə Murad Xaçayev özü idealayaxın variantdı. İrəli zonada da bəlkə Emin Mahmudov. Ya da ki Anatoli Nuriyev. Vingerlərin biri Toral ola bilər. Digəri də Rüstəm. Mərkəzdə isə tam formadadısa, Nəriman. Yəqin ki, son iki ayda klubunda bir oyuna belə çıxmayan Mahir Emreli oynamaz.

Ayxan bəy, çempionu səfərdə “Benfika”nı məğlub edən, ÇL-də iki oyuna 6 xal toplayan ölkənin futbolu Fransadan xal da ala bilər. İnanıram ki, siz də futbolçuları bunu kökləyə biləcəksiz. Mən inanıram ki, siz bunu bacaracaqsız! Fransadan xal da almaq olar, xallar da! Yetər ki, motivasiya və inam olsun.
Xal və ya xallar almaq real olmasa da, ən azı mənim arzumdu. Arzulamaq ki günah deyil!

MÜZƏFFƏR QULUZADƏ