Usman Dembele bu gedişlə “Barselona”nı tərk etməli olacaq. Rəhbərlik futbolçu ilə yeni müqavilə üzrə danışıqları dayandırıb.

“Football-plus.az” xəbər verir ki, “Sport.es” saytının yaydığı xəbərə görə, buna klubun çətin maliyyə vəziyyəti və La Liqada müəyyən edilən maaş limiti səbəb olub. Dembelenin “Barselona” ilə müqaviləsi 2024-cü ilin yayında qüvvədən düşəcək. Klub fransız futbolçu ilə müqavilənin müddətini uzatmaq istəyir. 25 yaşlı hücumçu da komandada qalmağı planlaşdırır. O, keçən il maaşının artırılmasından imtina edib və çox güman ki, yeni müqaviləyə əsasən daha çox qazanmaq istəyəcək.

Qeyd edək ki, Usman bu mövsüm bütün turnirlərdə 28 matçda iştirak edib, 8 qol vurub və 7 məhsuldar ötürmə edib (La Liqanın “Jirona” ilə oyunu bu statistikada nəzərə alınmayıb).