Beynəlxalq Peşəkar Futbolçular Birliyi (Fifpro) 2024/25 mövsümünə aid ''futbolçuların sağlamlığı və performansı'' adlı bir raport açıqlayıb.

Orda ötən mövsüm bütün turnirlərdə ən çox forma geyən futbolçuların siyahısı və digər maraqlı göstəricilər qeyd olunub. Bu siyahıda ötən mövsümü ''Benfika''da keçirən, bu yay isə ''Fənərbaxça''ya transfer olunan Kərəm Aktürkoğlunun 5-ci pillədə yer alması diqqət çəkib.

26 yaşlı futbolçu ötən mövsüm ''Benfika''nın heyətində daxili turnirlərdə 40, avrokuboklarda 18, hazırlıq oyunlarında 1, Türkiyə yığmasında isə 10 oyunda olmaqla ümumilikdə 69 qarşılaşmada forma geyib. Siyahının zirvəsində 40 yaşlı Luka Modriçin qərarlaşması heyrət doğurmaya bilməz. ''Qızıl top''u qazanmış xorvatiyalı əfsanə klub futbolunda 66, yığmada isə 10 oyunda olmaqla 76 matçda forma geyib.

Xatırladaq ki, uzun illər ''Real''da çıxış etmiş Modriç bu mövsüm ''Milan''ın uğurları üçün tər tökür. Sonrakı pillələrdə ''Real''dan Federiko Valverde (72), PSJ-dən Fabian Ruiz (71) və ''İnter''dən Alessandro Bastoni (70) qərarlaşıb. Əşrəf Hakimi, Coşua Kimmix, Pedri, Joao Neveş və Dezire Due də Kərəm kimi 69 oyun keçirib. Bundan başqa futbolçuların adlarının mövsüm ərzində neçə dəfə iştirak ərizəsinə salınması ilə bağlı statistika da açıqlanıb.

Maraqlıdı ki, bu siyahıya türkiyəli ulduz Arda Gülər başçılıq edir. Klublararası Dünya Çempionatını da nəzərə alsaq, Arda ötən mövsüm klub və yığma səviyyəsində 80 matçın iştirak ərizəsinə düşüb!

''Barselona'' və İspaniya yığmasının gənc ulduzu Lamin Yamal isə 18 yaşı tamam olana peşəkar səviyyədə 130 oyun keçirməklə bu göstəricidə futbol tarixinin yeni rekordçusu olub.