''Beşiktaş''la derbi bir çox baxımdan ''Qalatasaray'' üçün uğursuz alındı. Türkiyə çempionu həm mövsümdə ilk dəfə büdrədi, həm də iki əsas müdafiəçisini itirdi. Söhbət hələ ilk yarıda qırmızı vərəqə alan Devinson Sançes və erkən əvəzlənən Uilfrid Sinqodan gedir.

"Football-plus.az" xəbər verir ki, yayda ''Monako''dan 30 milyon avroya transfer edilən Sinqo sol ayaq əzələsini dartıb və təxminən 4-5 həftəliyə sıradan çıxıb. Kot d'İvuarlı futbolçunun yığma fasiləsindən sonra ''İstanbul BŞ'', ''Bude/Qlimt'', ''Göztəpə'' və ''Trabzonspor''a qarşı oyunları buraxacağı gözlənilir.

Onun bir də noyabrın əvvəllərində Çempionlar Liqasında liqa mərhələsinin 4-cü turunda ''Ayaks''la oyunda meydanda olacağı proqnozlaşdırılır. Sançes isə birbaşa qırmızı vərəqə aldığı üçün ona iki oyunluq cəza veriləcəyi gözlənilir. Kolumbiyalı müdafiəçi superliqanın qarşıdakı iki turunda ''İstanbul BŞ'' və ''Göztəpə'' ilə oyunları buraxacaq.

Baş məşqçi Okan Buruk bu oyunlarda müdafiə xəttində ciddi dəyişikliklərə getməli olacaq.