Argentina çempionatının Klausura (bağlanış) mərhələsinin 10-cu turundan sonra A qrupunun liderlər qrupunda vəziyyət olduğu kimi qaldı, B qrupunda isə “Deportivo Riestra” liderliyini qorudu.

"Football-plus.az" xəbər verir ki, A qrupunda tura liderlər qrupunda başlayan hər üç komanda xal itirdi. 8-ci turda topların daha yaxşı fərqinə görə 1-ci yerə yüksələn “Union” evdə “İndependyente Rivadaviya” ilə 2:2 hesablı heç-heçəyə razılaşandan sonra “Banfild”dən də bir xal ala bildi. Leonardo Madelonun çalışdırdığı komanda iki xal itkisinə baxmayaraq, qrupun vahid lideri kimi mövqeyini yenə qorudu.

Ona görə ki, liderin izləyiciləri də turu xal itkisi ilə başa vurdular. “Barrakas Sentral” öz meydanında “Belqrano” ilə 1:1 hesabına razılaşdı. Amma ardıcıl ikinci oyunda büdrəmə Ruben İnsuanın komandasının 2-ci yerdəki mövqeyinə təsir etmədi. Çünki tura “Barrakas Sentral” kimi 15 xalla başlayan “Estudiantes” də səfərdə “Nyuellz Old Boyz” ilə eyni hesaba razılaşdı. Qələbəni son dəqiqələrdə əldən verən “tələbələr” 3-cü yerdə qaldılar.

Maraqlıdı ki, bu qrupda tura 14 xalla 4-5-ci yerləri bölüşməklə başlayan komandaların heç biri xal qazana bilmədi. “Boka Xuniors” səfərdə “Defensa y Xustisiya”ya 1:2 hesabıyla uduzdu. Bütün qolları son 20 dəqiqədə vurulan matçın həlledici mərhələsi çox maraqlı alındı. Osorio 84-cü dəqiqədə penalti ilə ev sahiblərini önə keçirdi, 4 dəqiqə sonra Paredes də eyni vəziyyətdə hesabı bərabərləşdirdi. Əsas vaxta əlavə olunan dəqiqələrdə isə həmin Osorio komandasına qələbə qazandırdı. Ardıcıl iki heç-heçədən sonra alınan məğlubiyyət Migel Anxel Russonun çalışdırdığı “Boka Xuniors”u 4-cü yerdən 6-ya saldı. Öz meydanında “Tiqre”yə minimal hesabla uduzan “Sentral Kordoba” isə cədvəldə üç pillə geriləməklə 8-ci yerə yuvarlandı. İndi A qrupunda 4-5-ci yerləri hərəyə 15 xala malik olan “Defensa y Xustisiya” ilə “Tiqre” tuturlar.

Mövsümün ikinci mərhələsinə uğursuz başlayan vitse-çempionun da işləri qaydasında getmir. Startdakı böhrandan çıxan “Atletiko Urakan” yenidən xalları sağa-sola “xərcləməklə” məşğuldu. Frank Kudelkanın komandası səfərdə “İndependyente Rivadaviya”dan bir xal ala bildi. Qolsuz “sülh” vitse-çempionun A qrupunun 11-ci pilləsindəki yerini dəyişmədi. Növbəti eniş “atletlər”i pley-offa vəsiqə verən ilk “8-lik”dən kənarda qoya bilər.

B qrupunda baş verən hadisələr də maraqlıdı. Əvvəlki turda səfərdə “Atletiko Tukuman”dan (0:2) xal ala bilməyən “River Pleyt” liderliyini itirmişdi. Ölkə nəhəngi Klausurada ilk dəfə uduzmuş, “Deportivo Riestra” ilk dəfə liderliyə yüksəlmişdi. Hesabat turunda bu komandalar arasındakı oyunun nəticəsi böyük maraq doğururdu. “River Pleyt” evdə qalib gəlməklə əvvəlki mövqeyini geri qaytaracaqdı. Lakin Marselo Qalyardonun komandası hesabına bir xal belə yaza bilmədi. Halbuki “milyonçular” oyun palnında rəqibini aşkar üstələdilər. Topa 82 faiz sahib olan paytaxt təmsilçisi qapıya 21, qapı çərçivəsinə isə 9 zərbə endirdi. Dəqiq zərbələrdən 8-ni zərərsizləşdirən qonaqların qapıçısı Arse matçın qəhrəmanı adına ən layiq oyunçu idi. Doğrudu, onun komandasına qələbə gətirən qolları Alonso ilə Pedro Ramires vurdular. Hər iki qolun ötürməsini yarımmüdafiəçi Monxenin verdiyini də qeyd edək. Qalopponun qolu isə “River” üçün kiçik təsəlli oldu. Ölkə nəhəngi üzərində supereffekli oyunla qalib gələn Qustavo Benitesin komandası 1-ci pillədəki yerini qorudu. Ardıcıl ikinci məğlubiyyət isə “River”i 3-cü yerə saldı.

Bu qrupda tura 3-cü yerdə başlayan “Veles Sarsfild” evdə “Atletiko Tukuman”a 3:1 hesabıyla qalib gəldi. “River Pleyt”in büdrəməsindən yararlanan paytaxt komandası xalını 21-ə çatdırmaqla 2-ci yerə çıxdı. B qrupunda 4-cü yeri əvvəlki kimi “Lanus” tutur.
Mövsümün Apertura (açılış) adlanan ilk mərhələsinin qalibi olan “Platense” qeyri-sabit çıxışını davam etdirir. Kristian Qonsalesin komandası bu dəfə hesabına xal yaza bildi. “San Martin San Xuan” ilə 2:2 hesablı “sülh” son çempionu 11-ci yerdən 10-a yüksəltdi. İlk hissədə hesabı bərabərləşdirən Ronaldo Martines çempionatda 7-ci qolunu vurmaqla bombardirlərin siyahısında liderliyini bir qədər də möhkəmləndirdi.

qrup mərhələsi, 10-cu tur
Banfild - Union 0:0

Barrakas Sentral – Belqrano 1:1
Kandia, 16 – Xara, 49.

Nyuellz Old Boyz - Estudiantes 1:1
Lolyo, 90+1 – Mesa, 75.

Defensa y Xustisiya - Boka Xuniors 2:1
Osorio, 84-p.; 90+4 – Paredes, 88-p.

Sentral Kordoba - Tiqre 0:1
Kabrera, 60.

River Pleyt - Deportivo Riestra 1:2
Qaloppo, 25 – Alonso, 12. P.Ramires, 51.

Veles Sarsfild - Atletiko Tukuman 3:1
Brayan Romero, 36; 39. Valdes, 90+4 – Baxamiç, 14.

İnstituto - Lanus 0:0

San Lorenso - Qodoy Krus 2:0
Q.Ernandes, 45. Kuelyo, 53-p.

Platense - San Martin San Xuan 2:2
R.Martines, 12. M.Rodriges, 90+5 - D.Qonsales, 3. T.Fernandes, 67.

Ximnasiya - Rosario Sentral 0:3
Velis, 2. E.Ximenes, 83. Di Mariya, 86.

Aldosivi - Arxentinos Xuniors 0:2
Serato, 76-öz qapısına. E.Lopes, 80.

Talyeres de Kordoba - Sarmyento 1:0
Bustos, 88.

Rasinq - İndependyente 0:0
İndependyente Rivadaviya - Atletiko Urakan 0:0

A qrupu
1. Union 10 4 5 1 15-8 17
2. Barrakas Sentral 10 4 4 2 12-10 16
3. Estudiantes 10 5 1 4 11-11 16
4. Defensa y Xustisiya 10 4 3 3 11-9 15
5. Tiqre 10 4 3 3 9-7 15
6. Boka Xuniors 10 3 5 2 13-8 14
7. Arxentinos Xuniors 10 4 2 4 12-8 14
8. Sentral Kordoba 10 3 5 2 12-9 14
9. Banfild 10 4 2 4 9-13 14
10. Belqrano 10 3 4 3 10-8 13
11. Atletiko Urakan 10 3 4 3 5-8 13
12. Rasinq 10 3 2 5 10-12 11
13. İndependyente Rivadaviya 10 2 4 4 10-12 10
14. Nyuellz Old Boyz 10 2 4 4 9-12 10
15. Aldosivi 10 0 3 7 1-14 3

B qrupu
1. Deportivo Riestra 10 7 1 2 14-6 22
2. Veles Sarsfild 10 6 3 1 14-5 21
3. River Pleyt 10 5 3 2 17-9 18
4. Lanus 10 5 2 3 9-8 17
5. San Lorenso 10 4 4 2 8-6 16
6. Rosario Sentral 9 3 6 0 9-4 15
7. Atletiko Tukuman 10 3 3 4 11-11 12
8. Sarmyento 9 3 3 3 8-10 12
9. İnstituto 10 2 5 3 5-11 11
10. Platense 9 2 4 3 10-13 10
11. San Martin San Xuan 10 2 4 4 8-11 10
12. Talyeres de Kordoba 10 2 4 4 5-9 10
13. Ximnasiya 10 3 1 6 6-12 10
14. Qodoy Krus 10 1 5 4 8-13 8
15. İndependyente 9 0 5 4 5-9 5

Bombardirlər: R.Martines (Platense) - 7, Di Mariya (Rosario Sentral), Qaloppo (River Pleyt) – 5, Kastilyo (Lanus), X.Errera (Deportivo Riestra), Miritelyo (Defensa y Xustisiya), Bayan Romero (Veles Sarsfild), Tarraqona (Union) - 4.