Gələn mövsümdən etibarən “Formula-1” komandalarının xərc limiti 135 milyon dollardan 215 milyon dollara yüksəldiləcək.

"Football-plus.az" xəbər verir ki, bu qərar 2026-cı ildə qüvvəyə minəcək yeni texniki reqlamentə hazırlıqla bağlıdı.

Turnirdə “Zauber” bazasında debüt edəcək “Audi” komandası üçün limit bir qədər yüksək olacaq. Səbəb İsveçrədə əməkhaqlarının Böyük Britaniya və İtaliyada yerləşən rəqiblərlə müqayisədə daha yüksək olmasıdı. Eyni zamanda, əvvəlki istisnalar qüvvədə qalır: pilotların maaşları və komandanın ən yüksək məvacib alan üç əməkdaşının xərcləri büdcə limitinə daxil olunmur.

Beynəlxalq Avtomobil Federasiyasının (FIA) maliyyə qaydaları üzrə direktoru Federiko Lodi bildirib ki, bu, kapitalın artırılması yox, sadəcə, hesablanma metodunun yenilənməsidi.