Horner daha aşağı kompensasiyaya razılaşıb
“Red Bull”un rəhbəri vəzifəsindən qovulan Kristian Hornerin bu komandadan kompensasiya aldığını xəbər vermişdik.
Müxtəlif mənbələrin xəbərində bu məbləğ 80-100 milyon dollar arasında dəyişir. “Sky Sports” isə iddia edir ki, Horner daha çox kompensasiya ala bilərdi, ancaq bu halda 2026-cı ilin aprelinə qədər nəzərdə tutulan məcburi məzuniyyət dövründən tez işə başlamaq mümkün olmayacaqdı. O, sadəcə, məbləğin azaldılmasına razılıb verib ki, artıq “Formula-1” üzrə dünya çempionatının növbəti mövsümündə hansısa komandada çalışsın.
“Sky Sports”un əməkdaşı Kreyq Sleyterin versiyası belədi:
“Horner daha aşağı məbləğdə kompensasiyaya razılaşdı ki, 2026-cı ildə “Formula-1”ə qayıda bilsin. Bu lap ilin əvvəlində baş verməyəcək, ancaq yaya qədər hansısa komanda ilə işbirliyinə başlaması mümkündü. Gələn yazın sonuna qədər Horneri yenidən “Formula-1” səhnəsində görə bilərik. Horner belə hesab edir ki, hələ də “Formla-1”ə çox şey verə bilər. Onun cəmi 51 yaşı var, indi bir qədər artıq pul da qazandı, təbii ki, dönməyə çalışacaq. Bəlkə də özünü komanda rəhbərindən daha yüksək postda sınamaq istəyəcək”.
Şayiələrə inansaq, Hornerin “Alpine” və “Haas” komandalarından birinin həmsahibi olması mümkündü.
Digər xəbərlər
