“Formula-1” komandalarından “Red Bull”un sabiq rəhbəri Kristian Horner özünə yeni iş yeri tapmağa yaxındı.

"Football-plus.az" xəbər verir ki, onun “Kadillak”a başçılıq etməsi gözlənilir. Növbəti mövsümdən dünya çempionatında çıxış edəcək ABŞ komandası təcrübəli mütəxəssislə danışıq aparır. Horner şirkətin hazırladığı layihə ilə tanış olub və yaxın günlərdə tərəflərin əməkdaşlığa başlaması gözlənilir.
Yeri gəlmişkən, “Kadillak” Hornerin rəhbərliyi altında 3 il “Red Bull”da çalışan Serxio Pereslə də danışıq aparır. Meksikalı pilotun Amerika komandasına keçmək ehtimalı yüksəkdi. “Kadillak” DÇ-nin 11-ci iştirakçısı olacaq.

“Red Bull” 51 yaşlı britaniyalının postundan qovulduğunu iyulun 9-da açıqlayıb. Onun yerini əvvəllər RB-yə rəhbərlik edən Loran Mekis tutub. Horner 2005-ci ildən “Red Bull”da çalışırdı.

“Öküzlər” onun rəhbərliyi altında 6 dəfə Mühəndislər kubokunu qazanıb, bu komandanın pilotları 8 dəfə dünya çempionatının qalibi olub.