“Bank Respublika Arena” yenə zülmətə qərq oldu, klub problemi açıqladı
“Sabah” - “Sumqayıt” oyununda matç zamanı projektor söndü. 29-cu dəqiqədə zülmətə qərq olan “Bank Respublika Arena” 16 dəqiqə sonra - 45-ci dəqiqədə “Şəhidlər ölməz, vətən bölünməz” şüarları səslənərkən nurlandı.
Maraqlıdı ki, Masazırda işıq problemi yox idi. Stadionda elektrik yuvaları işləyirdi, ətrafdakı yaşayış yerlərində işıqlar yanırdı. Bəs klub projektorun problemini necə izah edir? Generator yox idimi? Suallarımıza “Sabah”ın mətbuat xidmətinin rəhbəri Elnur Həmidov cavab verdi.
“Stadiona gələn xətdə problem yarandığından elektrikin verilməsində qısa müddətli fasilə yaranıb. Bundan sonra stadionda olan generator işə düşüb. Bu proses bir qədər vaxt apardığından stadionda elektrikin bərpa edilməsi üçün bir neçə dəqiqə lazım olub. Artıq stadionda bunun üzərində iş gedir, növbəti oyunlarda oxşar problemin yaranmaması üçün tədbirlər görülür”.
Xatırladaq ki, 2024/25 mövsümündə, mayın 9-da keçirilən “Sabah” – “Şamaxı” oyununda da eyni problem yaşanmışdı. Ümumiyyətlə, stadionda generator olmalıdı ki, işıq sönən kimi işə düşsün, stadionun enerji təchizatında problem yaranmasın. Əslində Əliyar Ağayevin tam haqqı var idi ki, oyunu dayandırsın, yəni təxirə salsın. Bir sözlə, “Sabah” problem təcili həll etməlidi. Sabah avrokubok oyununda problem yaransa, necə olacaq?!MÜZƏFFƏR QULUZADƏ
Digər xəbərlər
