Əslində Müstəqil Dövlətlər Birliyinin ölü qurum olduğu hər kəsə bəllidi. Çox güman, heç 4-cü MDB Oyunları olmayacaq. Birlik üzvü ölkələr arasında o qədər ziddiyyətlər, fikir ayrılıqları var ki, onlar indi bir-birinə zorla pərçimlənmiş kimi görünür. Bu necə birlikdi ki, Rusiya bütün sabiq qardaşlarına meydan oxuyur, ərazi bütövlüyü BMT səviyyəsində tanınan Ukraynanı işğal etmək üçün 2022-nin fevralından bəri müharibə aparır, kəndləri, qəsəbələri, şəhərləri yer üzündən silir. Belə məqamların sayı çoxdu, ancaq “Futbol+” idman nəşridi, “dərin sularda üzmək” istəmirəm. Başqa məqama toxunacam.

Bəlkə də MDB Oyunları ideyasından ən qazanclı çıxan şəhər ...Gəncədi. Niyə? Çox sadə səbəbdən: uzun illərdi stadion problemindən gileylənən, uğursuzluğu həm də bu amillə izah edən azarkeşlər, problemin yoluna qoyulması üçün əlini ağdan-qaraya vurmayan şəhər rəhbərliyi faktiki heç nədən çox gözəl bir idman qurğusu qazandı. Bildiyim-gördüyüm qədəri ilə 10 hektardan artıq ərazidə ən müasir standartlara cavab verən 15 min yerlik stadion tikilib. Sentyabrın 28-də MDB Oyunları başa çatacaq və stadion şəhərin, daha doğrusu, “Kəpəz”in ixtiyarına veriləcək. Bəs ondan sonra nə qalır? O məşhur filmdə deyildiyi kimi: OYNAMAQ!

Çox təəssüf ki, “Kəpəz” belə əlamətdar olayı heç də xoş əhval-ruhiyyədə qarşılamır. Son illərdə artıq neçənci dəfədi ki, Gəncə təmsilçisi xroniki xəstəlik yaşayır, həyatla ölüm arasında get-gəl edir. Hər dəfə hansısa xilaskar məşqçi səhnəyə çıxır, “Kəpəz”ə ruh, can verir, komanda birtəhər elitada yerini qoruyur. Ötən mövsüm gəncəlilərin qanının arasına “Səbail” girdi. Görəsən, bu mövsümün “Səbail”i kim olacaq – “Karvan-Yevlax”, yoxsa “Qəbələ”? Mayda bu suala daha rahat cavab verə biləcəyik.

Hələlik ortada olan mənzərə budu ki, “Kəpəz” növbəti dəfə əziyyət çəkir, canıyla əlləşir. Mövsümlərarası fasilə boşa verilib – istər seleksiya prosesi, istərsə də komanda quruculuğunun bütün başqa aspektləri baxımından. Erkin İbrahimovun vasitəçiliyi ilə gətirilən futbolçuların əksəri gedənlərdən güclü deyil. Mövsümə altı məğlubiyyətlə başlayan komandanın artıq baş məşqçisi də yoxdu. Gəncəli azarkeşlərin inanılmaz təzyiqinə düçar olacaq yeni məşqçi – Mister X “Kəpəz”i bu vəziyyətdən çıxarmaq missiyasını boynuna götürməlidi.

Bu gün klubun yeganə avantajı yeni stadiondu. “Kəpəz”i sərgərdan həyatdan qurtaracaq, ona yeni həyat verəcək stadion. Çox güman, gəncəli azarkeşlər komandanın doğma şəhərdə keçirəcəyi növbəti ev oyununu böyük səbirsizliklə gözləyir. Axı bütün son illər ərzində başqa komandaların və stadionların azarkeş rekordları ilə bağlı söz düşəndə gəncəlilər sosial şəbəkələrdə belə cavab verirdi: qoy bizim də stadionumuz olsun, onda baxarıq.

Nəhayət, həmin gün yetişdi. İndi Gəncənin ən yeni, çox gözəl stadionu var. Və bir də zəif, rəqabətədavamlı olmayan “Kəpəz”i. Həmin “Kəpəz” həmin stadiona azarkeşləri qaytarmalı, onlarla birgə ilk növbədə elitada qalmaq vəzifəsinin öhdəsindən gəlməlidi. Artıq hər kəs anlayır ki, müxtəlif bəhanələrə və mülahizələrə əsaslanıb, hansısa komandanı elitada saxlamaq dönəmi keçdi. AFFA rəhbərliyindən mədət ummağa, güzəşt gözləməyə dəyməz. “Kəpəz” olmur, lap “Neftçi” olsun, elitada oynamaq, qalmaq bacarığını yaşıl meydanda sübut etməlidi.

“Kəpəz” üçün stadionsuzluq dönəmi bitdi, özünüsübut dönəmi başladı. Mübarəkdi!

ORXAN