La Liqada indi yalnız üç komanda uduzmayıb. Bunlar “Real”, “Barselona” və “Elçe”di.

Nəhənglər hesabat turunu da qələbə ilə başa vurdu. “Atletiko” heç-heçə etdi, “Qarabağ”ın Çempionlar Liqasındakı rəqibi “Atletik” isə ardıcıl ikinci oyunda uduzdu.

“Espanyol” mövsümdə ilk məğlubiyyətini “Santyaqo Bernabeu”da “Real”dan aldı. Kataloniyalılar ilk yarıda “dişini göstərsə” də, Militao hesabı açmaqla onları sakitləşdirdi. Mbappe 47-ci dəqiqədə ikinci qolu vurandan sonra qonaqların məğlubiyyətdən qurtulmaqla bağlı ümidləri puç oldu. Kilian hətta dubl da edə bilərdi. Xabi Alonsonun komandası hələ ki itkisiz irəliləyir. Amma biz ispaniyalı mütəxəssisin bacarığına ÇL-də bir neçə oyun keçirəndən sonra qiymət verə biləcəyik. Ya bəlkə də 7-ci turun “Atletiko” ilə oyununda sonra. Hələlik isə reallıq məhz “Real”ın La Liqanın zirvəsində olduğunu göstərir.

“Xetafe” çempiona müqavimət göstərə bilmədi. Meydana yaxşı əhval-ruhiyyə və güclü heyət ilə çıxan “Barselona” 15-ci dəqiqədə hesabı açdı. Rafinya ilə Olmonun qurduğuu hücumu Torres bitirdi. Qoldan sonra tempi bir qədər aşağı salan meydan sahibləri bir də 20 dəqiqədən sonra fərqləndi. Bu dəfə də Torres rəqib qapısına yol tapdı. Hissənin sonunda kataloniyalılar 3-cü qolu da vurmağa, intriqanı tam öldürməyə çalışdı. Ancaq Levandovski ilə Torres əla imkanı boşa verdi, özü də Ferranın zərbəsi zamanı qonaqları tir xilas etdi.

“Xetafe”nin baş məşqçisi Xose Bordalas 2-ci hissəyə üç əvəzetmə ilə başladı. Ancaq bu dəfə də komandası cəmi 17 dəqiqə davam gətirdi. Flikin oyunöncəsi səhər iclasına gecikdiyinə görə start heyətindən çıxardığı Reşford Olmonu zərbə mövqeyinə çıxardı və fərq darmadağın həddinə çatdı. Sıx qrafiki nəzərə alan “Barsa” qalan dəqiqələri, sadəcə, yola verdi.

“Atletiko” hələ ki qeyri-sabit nəticə göstərir və “Real”la derbi ərəfəsində belə durum narahatlıq doğurmaya bilməz. “Hindular” “Malyorka” ilə səfər oyunundan 1 xalla qayıtdı. Alvaresə birdəfəlik penalti vurmağı qadağan etmək lazımdı. “Atletiko” ötən mövsüm məhz onun üzündən ÇL-dən çəkildi, bu dəfə isə argentinalı 14-cü dəqiqədə qapıçı ilə dueldə uduzdu.

İlk yarıda başqa qol vəziyyəti olmadı, ümumiyyətlə, bütün maraqlı hadisələr 2-ci hissədə baş verdi. 72-ci dəqiqədə Sörlot meydandan qovuldu, halbuki cəmi 10 dəqiqə əvvəl oyuna qoşulmuşdu. Madridlilər 7 dəqiqə sonra Qallaherin sayəsində hesabı açsalar da, sonda Muriqi tablodakı rəqəmləri eyniləşdirdi.
“Atletik” “Jirona”nın taleyini təkrarlaya bilər.

“Qarabağ”ın 3-cü turdakı rəqibi “Arsenal”la oyunda can qoydu və uduzdu. Basklar çempionatda da eyni taleni yaşadı. “Valensiya” ilə səfər oyununun həlledici anı Vivianın 61-ci dəqiqədə “son ümid folu”na görə meydandan qovulması oldu. Bundan sonra təzyiqi artıran “yarasalar” baskların qapısına iki dəfə yol tapdı.

Turun qalan oyunlarına gəlincə, “Ovyedo”ya qalib gələn “Elçe” məğlubiyyətsiz oyunlar seriyasını 5-ə çatdırdı. “Atletik”lə yanaşı, baskların daha iki klubu uduzdu – “Real Sosyedad” səfərdə “Betis”ə, “Alaves” evdə “Sevilya”ya. “Vilyarreal” evdə “Osasuna”ya qalib gəldi. “Rayo Valyekano” – “Selta” oyununda komandalar hərəyə 1 qol vurdu. Turun ən böyük darmadağını Kataloniyada qeydə alındı: “Levante” səfərdə “Jirona”nın qapısından 4 cavabsız qol keçirdi.

5-ci tur
Real – Espanyol 2:0
Militao, 22. Mbappe, 47. (73466)
Real: Kurtua, Karvaxal, Asensio, Militao, Karreras, Valverde, Çuameni (Kamavinqa, 90), Mastantuono (Dias, 77), Vinisius (Rodriqo, 77), Mbappe (Bellingem, 89), Q.Qarsiya (Gülər, 60).

Barselona – Xetafe 3:0
Torres, 15; 34. Olmo, 62. (5711)
Barselona: X.Qarsiya, Kunde, E.Qarsiya, Kristensen, Martin (Arauxo, 84), Pedri (Bardaqji, 76), Olmo, De Yonq (Kasado, 60), Rafinya (Reşford, 46), Torres (Lopes, 60), Levandovski.

Malyorka – Atletiko 1:1
Muriqi, 85 – Qallaher, 79. (21027)
Atletiko: Oblak, Hantsko, Lanqle, Le Norman, Lyorente, Barrios (Qallaher, 68), Koke, Simeone (Qrizmann, 62), Qonsales (Ruceri, 77), Alvares (Sörlot, 62), Raspadori (Molina, 62).

Valensiya – Atletik 2:0
Santamariya, 73. Duro, 90+3. (46004)
Atletik: Simon, Berçiçe, Paredes, Vivian, Areso, Xauregisar (Reqo, 81), De Qalarreta (Vesqa, 68), Berenger (Lyaport, 64), Sanset (Sannadi, 68), Navarro (U.Qomes, 68), İ.Uilyams.

Betis – Real Sosyedad 3:1
K.Ernandes, 7. Remiro, 49-öz qapısına. Fornals, 69 – Mendes, 13. (59773)

Jirona – Levante 0:4
Eyonq, 43. Alvares, 49. Romero, 70. Koyyalipu, 90+2. (11048)

Alaves – Sevilya 1:2
Visente, 17-p. – Varqas, 10. Sançes, 67. (17525)

Vilyarreal – Osasuna 2:1
Mikautadze, 69. Geye, 86 – Budimir, 45+6-p. (17542)

Rayo Valyekano – Selta 1:1
De Frutos, 65 – İqlesias, 49. (13028)

Elçe – Ovyedo 1:0
A.Silva, 9. (27235)

1. Real 5 5 0 0 10-2 15
2. Barselona 5 4 1 0 16-3 13
3. Vilyarreal 5 3 1 1 10-4 10
4. Espanyol 5 3 1 1 8-7 10
5. Elçe 5 2 3 0 7-4 9
6. Betis 6 2 3 1 9-7 9
7. Atletik 5 3 0 2 6-6 9
8. Xetafe 5 3 0 2 6-7 9
9. Sevilya 5 2 1 2 9-8 7
10. Alaves 5 2 1 2 5-5 7
11. Valensiya 5 2 1 2 6-8 7
12. Atletiko 5 1 3 1 6-5 6
13. Osasuna 5 2 0 3 4-4 6
14. Rayo Valyekano 5 1 2 2 5-6 5
15. Selta 6 0 5 1 5-7 5
16. Levante 5 1 1 3 9-9 4
17. Ovyedo 5 1 0 4 1-8 3
18. Real Sosyedad 5 0 2 3 5-9 2
19. Malyorka 5 0 2 3 5-10 2
20. Jirona 5 0 1 4 2-15 1

Bombardirlər: Mbappe (Real) - 5, Muriqi (Malyorka), Torres (Barselona) – 4.

Növbəti turun oyunları sentyabrın 23-25-i aralığında keçiriləcək: Atletik – Jirona, Espanyol – Valensiya, Levante – Real, Sevilya – Vilyarreal, Xetafe – Alaves, Atletiko – Rayo Valyekano, Real Sosyedad – Malyorka, Osasuna – Elçe, Ovyedo – Barselona. Bu turun “Selta” – “Betis” oyunu (1:1) avqustun 27-də keçirilib.

Turun rəqəmi
25 – “Barselona” Flik “sükan arxasına” keçəndən bəri bu qədər böyükhesablı qələbə qazanıb. Almaniyalı mütəxəssisin ötən yaydan bəri kataloniyalıları çalışdırdığını və artıq bir dəfə çempion etdiyini də xatırladaq.

Turun ulduzu
Leo Roman (Malyorka) – düzdü, bu dəfə də “Barselona”nın oyunçusu dubl edib. Ancaq kataloniyalılar Torressiz də “Xetafe”nin öhdəsindən gələrdi. Balearlıların qapıçısı isə “Atletiko” ilə oyunda penaltini dəf etməklə yanaşı, daha 5 önəmli seyvlə yadda qaldı.

Turun sitatı
Xabi Alonso, “Real”ın baş məşqçisi:

Faktlar
* Xabi Alonso Xose Kirante ilə Vanderley Luşemburqunun uğurunu təkrarladı. O, “Real”ın çempionatda ilk 5 oyunda qalib gələn 3-cü çalışdırıcısı oldu. Kirante bunu 1929-cu, Luşemburqu isə 2005-ci ildə bacarmışdı. Ümumiyyətlə, La Liqanın tarixində 11 belə məşqçi olub.
* Mbappe 2025-ci ildə bütün turnirlər çərçivəsində 37 qol vurub. “Böyük beşlik” ölkələrində çıxış edən heç bir futbolçu ondan çox fərqlənməyib. Mbappe həmçinin cərimə meydançası xaricindən vurulan qol sayında (6) “böyük beşlik”də liderdi.
* “Atletiko”nun Simeone dönəmində La Liqanın liderindən geriliyi antirekord həddinə çatıb. “Hindular” indi “Real”dan 9 xal geri qalır. Bu, Simeone dönəmində ilk 5 turdan sonra zirvədə qərarlaşan komandalardan ən böyük gerilikdi. 2023/24 mövsümündə “Atletiko” liderdən 8 xal geridə olsa da, ehtiyatda bir oyunu var idi. Qalan mövsümlərdən isə fərq 5 xaldan artıq olmayıb.
* Rafinya 2025-ci ildə məhsuldar ötürmələrin sayına görə rekorda yaxınlşadı. O, “Barsa”nın heyətində bütün turnirlərdə keçirdiyi 38 oyunda 16 belə ötürmə verib. Bu, “böyük beşlik” ölkələrinin liqalarında ən yaxşı 2-ci nəticədi. PSJ-dən Barkolyanın il ərzində 19 məhsuldar ötürməsi var.

Oyundan sonra
Hans-Diter Flik, “Barselona”nın baş məşqçisi: