Həftəsonu “Fənərbaxça” camiəsində böyük səbrisizliklə gözlənilən növbədənkənar prezident seçkisi keçirildi.

Əvvəlcə seçkidə mübarizənin üç namizəd – Əli Koç, Səadəttin Saran və Hakan Bilal Kutlualp arasında gedəcəyi gözlənilirdi. Amma seçkiyə bir neçə gün qalmış Hakan Bilal Kutlualp Saranın tərəfinə keçərək namizədliyini geri götürdüyünü açıqladı.

Artıq şənbə günündən bəlli idi ki, Əli Koçun işi heç də asan olmayacaq. Onun uğursuzluqlarından boğaza yığılan fanatlar və klubun rəsmi üzvləri Səadəttin Sarana böyük dəstək nümayiş etdirdilər. Koç hətta açıqlama vermək üçün kürsüyə çıxarkən etiraz sədaları üzündən normal danışmaqda çətinlik çəkirdi.

Seçkinin ən maraqlı hissəsi, yəni səsvermə prosesi bazar günü baş tutdu. 49268 rəsmi klub üzvünün səs vermək hüququnun olduğu səsvermədə 24732 üzv iştirak etdi. Onlardan 24393-nün səsi keçərli oldu. Səsvermənin nəticəsi camiədə demokratiyanın ön planda olduğunu göstərdi. Tarixi seçkidə Saran 12325, Koç 12068 səs topladı.

Beləliklə, cəmi 257 səs fəri ilə qalib gələn Saran “Fənərbaxça” tarixinin 38-ci prezidenti oldu! 2018-ci ildə Əziz Yıldırıma tarixi bir fərqlə qalib gələn, eləcə də 2021 və 2024-cü ildəki seçkidə uğur qazanan Koç isə bu dəfə növbədənkənar seçkidə “ağ bayraq qaldırmalı” oldu.

Onun 7 illik dönəmi həmişə fiasko kimi xatırlanacaq. Bu müddətdə transferlərə 260 milyon avrodan pul xərclənilməsinə, eləcə də bir çox önəmli məşqçinin gətirilməsinə baxmayaraq, çempionluq həsrətinə son qoymaq mümkün olmadı. Halbuki bu müddətdə “İstanbul BŞ”, “Trabzonspor” və “Beşiktaş” çempion oldu, “Qalatasaray” isə çempionluq sayını 25-ə çatdıraraq 5-ci ulduzu qazandı.

Hakan Bilal Kutlualpın son anda Saranın xeyrinə geri çəkilməsi də seçkidə mühüm rol oynadı. Saranın Kutlualpa başqan vəkili vəzifəsini verəcəyi gözlənilir. Saranın ən önəmli vədi çempionluqla bağlıdı. Onu camiənin gözündə yüksəldən daha bir məqam klubun daxili təlimatnaməsində reallaşdırmaq istədiyi dəyişiklikdi. Belə ki, Saran klubda çempionluq həsrətinin 3 ilə çatmasının ardından avtomatik növbədənkənar seçkinin keçirilməsini təklif edir. Bundan başqa, onun planı həyata keçirilsə, bundan sonra “Fənər”də 6 ildən artıq işləyən prezident olmayacaq!

Türkiyənin ən tanınmış iş adamlarından olan Səadəttin Saran 1964-cü ildə ABŞ-da doğulub. Maraqlıdı ki, o, 1984-85-ci illərdə Türkiyənin üzgüçülük üzrə yığma komandasında kapitan olub və hətta 50 metrə sərbəst üzmədə Türkiyə rekordunu yeniləyib. Daha sonra ABŞ-da Kentukki Universitetinin maşın mühəndisliyi ixtisasını oxuyaraq Türkiyəyə dönüb. Mövcud şirkətlərinin təməlini isə 1989-da “Saran İnternational” şirkətini qurmaqla qoyub. Ona məxsus “Saran Holdinq” şirkəti media, internet yayını, lotereya oyunları və müdafiə sənayəsi sahəsində fəaliyyət göstərir. O ilk dəfə hələ 2001-ci ildə Əziz Yıldırımın prezidentliyi dönəmində “Fənər”in idarə heyətində yer almış və 2 ildən sonra ayrılmışdı. Sonradan onun Yıldırımla münasibətləri pozulduğundan bir neçə il klubun rəsmi üzvlüyündən kənarlaşdırılmışdı. Amma 2022-ci ildə məhkəmədə qalib gələn Saran klub üzvlüyünü bərpa etmişdi.

Saranın sərvəti təxminən 400 milyon avro civarındadı və o, Türkiyənin ən varlı şəxsləri siyahısında ilk “20-lik”də yer almır. Müqayisə üçün deyək ki, Əli Koçun sərvəti təxminən 700-800 milyon avro idi.