Marandiçini tapdıq! – bəs, Azərbaycana nə vaxt gələcək?
Tovuzlu azarkeşlərin sevimli futbolçusu Denis Marandiçi sanki qeybə çəkilib.
Xatırlayırsızsa, moldovalı müdafiəçi ölkə kubokunun 2024/25 mövsümünün 1/8 finalının “Turan Tovuz” – “Sabah” matçında qonaqların futbolçusu Pavoş Şafrankoyla toqquşmuş və xəstəxanalıq olmuşdu. Sonradan aydın oldu ki, fibula sümüyünün tam yerini dəyişmiş sınığı və tibia sümüyünün yerini dəyişməmiş sınığı aşkarlanan futbolçunun ayağı gipsə qoyulub. Maraqlıdı ki, ötən il dekabrın 3-də baş vermiş hadisədən 10 aya yaxın vaxt keçsə də, Marandiçidən xəbər-ətər yoxdu.
Bəs, o, hardadı? Müalicəsi davam etdirilirmi? Yaşıl meydana qayıdacağı vaxt məlumdumu?
“Football-plus.az”ın suallarını “Turan Tovuz”un mətbuat xidmətinin rəhbəri Süleyman Tağıyev cavabladı:
“Marandiçi hazırda Portuqaliyadadı. O, hələ əməliyyatsonrası bərpa prosesi keçir. Hər şey planauyğun olacağı təqdirdə noyabrda Azərbaycana gəlib fərdi, daha sonra komanda ilə birlikdə məşqlərə başlayacaq”.
KƏNAN BAHADIR
Digər xəbərlər
