İspaniya yığması DÇ-2026-nı boykot edə bilər. Söhbət komandanın vəsiqə qazanacağı halda İsrail yığmasının da mundialda oynaması halında turnirin final mərhələsində iştirakdan mümkün imtinasından gedir.

“Marka” qəzetinin yazdığına görə, bununla bağlı İspaniya Konqresinin Sosialist qrupunun nümayəndəsi Patçi Lopes açıqlama verib. Ölkə hökumətinin bu mövqeyi İsrail komandalarının beynəlxalq idman yarışlarında iştirakıyla bağlı debatların davam etməsi fonunda formalaşıb. Lopes Konqresdə keçirilən mətbuat konfransında beynəlxalq idman təşkilatlarını İsrail təmsilçilərini turnirlərə buraxmamağa çağırıb. O, “biz bu varianta (dünya çempionatında iştirakdan boyun qaçırılmasını nəzərdə tutur – red.) bir müddət sonra baxacağıq” deyə bildirib.

Bu da var ki, FİFA və UEFA-nın Nizamnamələri dövlət və hökumət orqanlarının yerli futbol futbol federasiyasının işinə müdaxiləsini qadağan edir. Yeri gəlmişkən, İspaniya yığması hazırda DÇ-2026-nın seçmə turnirində E qrupunda keçirdiyi 2 oyunda 6 xal toplamaqla liderdi. Luis de la Fuentenin çalışdırdığı komandanın ABŞ, Kanada və Meksikada təşkil ediləcək dünya çempionatına birbaşa vəsiqə qazanmaq şansı yüksəkdi. İsrail isə I qrupunda 5 oyuna 9 xal toplayıb və İtaliya ilə 2-3-cü yerləri bölüşdürür. Xatırladaq ki, qrup qalibləri mundialda birbaşa oynamaq hüququna malikdilər. Qruplarda 2-ci yeri tutacaq komandalar isə pley-off mərhələsində oynayacaqlar.