“Real” rəhbərliyi böyük qəzəb içindədi.

"Football-plus.az" xəbər verir ki, İspaniya klubu iki aparıcı oyunçusunun sıradan çıxmasına görə daxili və beynəlxalq futbol təşkilatlarını günahlandırır.
Madridlilər Vinisius Junior və Eduardo Kamavinqanın milli komandalarında olarkən zədələnməsindən çox narazıdılar.

“Marca” qəzetinin məlumatına görə, paytaxt klubu buna görə İspaniya Futbol Federasiyası, La Liqa, FİFA və UEFA rəhbərliyini günahlandırır. “Real” rəhbərliyinin fikrincə, oyunçuların zədələnməsinə səbəb onların sıx oyun qrafikinə görə həddindən artıq yüklənməsidi.

Xatırladaq ki, Vinisius Braziliya millisinin DÇ-2026-nın seçmə mərhələsinin Kolumbiya ilə oyununda (1:2) zədələnib. O, 2024-cü ilin fevralına qədər yaşıl meydanlarda görünməyəcək. Fransa yığmasının məşqində zədələnən Kamavinqa isə təxminən 8-10 həftə oynaya bilməyəcək.

Yeri gəlmişkən, Cud Bellingemin son durumu açıqlanıb. “Real”ın futbolçusu zədəsini sağaldıb. O, komanda ilə məşqlərə başlayıb. 20 yaşlı hücumçunun La Liqada noyabrın 26-da keçiriləcək “Kadis”ə qarşı matçda iştirakı gözlənilir. Xatırladaq ki, Cud La Liqanın 12-ci turunun “Rayo Valyekano” ilə (0:0) matçında çiynindən zədələnmişdi. Onun bu səbəbdən İngiltərə millisinin AÇ-2024-ün seçmə mərhələsində Malta və Şimali Makedoniyaya qarşı oyunlarını buraxacağı açıqlanmışdı.