Ura! Ura! Nəhayət, Fernando Santuşdan canımız qurtardı! Bəli-bəli, futbolumuz çiyinləri üzərində daşıdığı yükdən qurtuldu. Heç şübhəsiz, belədi!

Təəssüf ki, onun millimizin baş məşqçi postuna təyin olunduğu gündən, ötən il iyunun 12-dən bəri həm maddi baxımdan çox şey itirdik, həm də mənəvi. Əslində məsələnin maliyyə tərəfiylə bağlı dəqiq məlumat yoxdu. Portuqaliyalı mütəxəssisin 2 milyon avro təzminat aldığını iddia edən həmkarlarımız da var, 4 milyon avro da. İstənilən halda, itki itkidi və hər iki rəqəm milyonlarla ifadə olunur.

Bu məqamda “pul əl çirkidi” deyib mənəvi yönə üz çevirəndə daha dəhşətli faktlarla üz-üz qalırıq. Belə ki, yığmamız Santuşun 14 ay 27 gün davam edən dövründə keçirdiyi 11 oyunda 9 məğlubiyyət, 2 heç-heçə ilə üzləşib. 4 qol vuran komandamız qapısında 29 top görüb. Ümumiyyətlə, Santuşun ölkəmizdəki karyerası həm özü, həm də millimiz üçün antirekordlarla zəngin oldu. Ən əsası, prtuqaliyalı futbolumuzun tarixinə qələbə qazana bilməyən ilk əcnəbi baş məşqçi kimi düşdü. Düzdü, bu baxımdan üç görüşdə bir heç-heçə, iki məğlubiyyətlə yadda qalan Qyoko Haciyevskini də fərqləndirmək olar. Lakin onun 2007-08-ci illərdə bu vəzifədə müvəqqəti çalışdığını qeyd etməliyik.

Hər şeyə rəğmən, bu gün hər kəs Santuşla yolların ayrılmasına sevinir. Elə o özü də! Hətta bununla bağlı vida mesajı da yayıb. Görün, nə deyib:

Beləliklə, bizim üçün Santuşun “kitabı bağlandı”. Ona 70 yaşından sonra bizdən başqa kim güvənəcək - Allah bilir. Amma bizim artıq əcnəbilərə güvənmək dövrümüz geridə qalmalıdı. Qeyd-şərtsiz!

Hansı əcnəbi baş məşqçidən xeyir görmüşük? Berti Foqts, Robert Prosineçki, Nikola Yurçeviç, yoxsa Canni de Byazi? Heç birindən! Onları yalnız “pisin yaxşısı” meyarına uyğun fərqləndirə bilərik. Artıq hamı bir nəfər kimi millinin yalnız yerli baş məşqçinin rəhbərliyi altında nicat tapacağına inanmalıdı. Əlbəttə, əksi də baş verə bilər. Öz aramızdı, heç olmasa, onda pullarımız özümüzkülərə qalar.

Hələ onu demirik ki, həmin məbləği istəməyən də olur. Necə ki, olub və indi futbolumuzun beynəlxalq arenada ayaqda qalmasının yeganə dayağı məhz odu! Bəli-bəli, düz tapdız, söhbət “Qarabağ”ın baş məşqçisi Qurban Qurbanovdan gedir. Hansı ki, indi millinin çalışdırıcısı postuna namizədlərdən biridi. Düzdü, onunla yanaşı, Ayxan Abbasov və Rəşad Sadıqovun da adı çəkilir. Ancaq məhz Qurban bəy yığmanı çalışdırası olsa, “Qarabağ” azarkeşləri xeyli narazı qalacaq. Artıq “İmarət Tayfa” bu barədə bəyanat yayaraq bildirib ki, bunu qəti ağlınızdan keçirməyin! Onlar da Rəşad Sadıqovun namizədliyini irəli sürənlər sırasına qoşulub. Vallah, Ayxan bəy də möhtəşəm seçim olar. Nə olsun ki, rəsmi debüt matçında Portuqaliyaya 0:5 hesabıyla uduzdu? Təsəvvür edin ki, bu ölkələrin əsas milliləri üz-üzə gəlir. Etdiz? Onda Ayxan Abbasovu bağışlayın!

Ümumiyyətlə, indi əcnəbi baş məşqçi seçimini ağlımızdan belə keçirməməliyik. Onları birmənalı şəkildə “qarı düşmən” kimi qəbul etməli, yola yerli və təcrübəli məşqçilərdən biriylə davam etməliyik. Hər halda, səbəbi izah etməyə ehtiyac yoxdu. Azı ona görə ki, bu yöndə Foqtsun təyinatından bəri 17 illik təcrübəmiz var.

Qəbul etmək ağır olsa da, eyni bataqlığa dəfələrlə düşmüşük. Növbəti əcnəbi məşqçi təyinatından sonra hadisələrin axarının necə olacağını əzbər bilirik. Bu öz yerində. Bəs Santuşun gedişi problemləri arxada qoydumu? Millimizin uğursuz nəticələrinin yeganə günahkarı həqiqətən 70 yaşlı mütəxəssis idi? Əlbəttə, yox və İslandiyaya qarşı matçda növbəti dəfə bunun əyani sübutuyla rastlaşdıq.

Görünür, Çempionlar Liqasının pley-off mərhələsində Bakıda “Qarabağ”a qarşı cavab oyunundan sonra keçirilən mətbuat konfransında çıxış edən “Ferentsvaroş”un baş məşqçisi Robbi Kin Azərbaycan futbolu haqda dediklərində haqlı imiş...

KƏNAN BAHADIR