Allah İdris müəllimə rəhmət eləsin.

Füzuli rayonundan məcburi köçkün kimi gələn İdris müəllim bizə 90-cı illərin ortalarında riyaziyyatdan və fizikadan dərs keçirdi. Məktəbimizin kişi müəllimləri aldıqları maaşla ailələrini dolandıra bilmədiklərinə görə hərəsi bir tərəfə dağılmışdı. Ona görə də İdris müəllim qısa müddətdə məktəbimizin dərs-hissə müdiri vəzifəsinə qədər yüksəldi, şagirdlərə bilik verməklə yanaşı, təlim-tərbiyə işlərinə də nəzarət etməyə başladı. İdris müəllimin bizə dediyi gözəl kəlamların çoxunu indi də xatırlayıram. Onlardan da biri yalanla bağlı idi. Müəllimimiz deyirdi ki, bir yalanı danışıb, sonra onu ört-basdır etmək üçün daha 40 dəfə yalan danışmaq lazım gəlir, yoxsa o yalanının da üstü açılacaq.

Ümid edirəm ki, Azərbaycanda futbol sahəsində çalışan çox dəyərli cənablara da orta məktəbdə oxuyanda müəllimləri tərəfindən belə ibrətamiz kəlamlar söylənilib. Onlar da yaxşı bilirlər ki, yalanın ömrü çox uzun sürmür, onu gizlətmək mümkün deyil. AFFA-nın baş katibi Sərxan Hacıyev millimizə yeni baş məşqçi təyin olunan portuqaliyalı çalışdırıcı Fernando Santuşun maaşı ilə bağlı suala cavab vermək istəməyib: “Müqavilənin bəzi hissələrini açıqlaya bilərik, bəzi hissələrini yox. Maliyyə tərəfini açıqlamırıq. Müqaviləmiz üçillikdi, bir il də artırılmaq şərti ilə. Təzminat, məbləğ məsələsini açıqlaya bilmərik”. Müqavilənin müddəti nəyimizə lazımdı, ay Sərxan bəy? Onsuz da bu müddət ərzində ciddi hansısa nəticə qazana bilməyəcəyik, Santuş da (Allah ona ömür versin) bir gün bizimlə çalışmaqdan bezəcək, təzminatını alacaq və ölkəsinə qayıdacaq.
İndi internet əsridi. AFFA açıqlamaq istəməsə də, 69 yaşlı çalışdırıcının Azərbaycanda qazanacağı məbləğin yüksək olduğunu təxmin etmək çətin deyil. Biz onsuz da belə şeylərin gizli saxlanmasına öyrəncəliyik. Ondan sonra mətbuatda müxtəlif rəqəmlər səslənir. AFFA isə bu rəqəmlərin şişirdildiyini, həqiqəti əks etdirmədiyini söyləməklə işini bitmiş sayır. Adama deyərlər ki, mətbuatda yazılan rəqəm doğru deyilsə, siz doğru olanı açıqlayıb. Bununla da söz-söhbətə son qoyulsun, hər şey də şəffaf şəkildə olsun. Onsuz da heç kim sizin əcnəbi çalışdırıcalara verəcəyini məvacibi həmin gəlmələrin əlindən tutub alacaq deyil. Belə olan halda rəqəmlərin gizli saxlanmasına nə gərək var? Bir də ki, maaşların gizli saxlanılması yaxşı təcrübə olsaydı, Avropanın qərbində, sivil dünyada belə davranardılar, heç bir mütəxəssisin və futbolçunun alacağı məvacib açıqlanmazdı.
Türkiyə mətbuatı bu ilin yanvarında “Beşiktaş”la anlaşan Fernando Santuşun məvacibin illik 3,3 milyon dollar olduğunu yazırdı. “Beşiktaş”ın sabiq, millimizin yeni baş məşqçisi İstanbul klubunda cəmi üç ay duruş gətirdi. “Samsunspor”la heç-heçə bitən oyundan sonra portuqaliyalı mütəxəssisi evə yola saldılar. “Beşiktaş”ın İdarə Heyətinin üzvü Onur Göçməz həmin oyundan sonra Santuşa təzminat kimi 500 min avro ödəyəcəklərini açıqlamışdı. Özü də fəxrlə bildirmişdi ki, bu 500 min avronu beş yerə bölüb, hissə-hissə verəcəklər. Guya ki, klubun büdcəsinə ağırlıq salmayacaqlar. Bu yerdə onu da qeyd edim ki, “qara-qartallar” onun rəhbərliyi altında çıxdığı 16 oyunda 7 qələbə qazanıb, 5 oyunda uduzmuşdular. Daha 4 oyun isə heç-heçə nəticələnmişdi. Ayrılıq qərarından sonra “Beşiktaş”dan verilən rəsmi açıqlamada 500 min avroluq təzminat təsdiqlənmiş, eyni zamanda da yanvarın 9-dan aprelin 14-nə qədər Santuşa 865 min 487 avro məvacib verildiyi qeyd olunmuşdu. Portuqaliyalının “Beşiktaş”da keçirdiyi üç aya görə təxminən 865 min məvacib alması onun bir il üçün elə 3 milyon avroya razılaşmasının təsdiqidi.

Bir neçə ay əvvəl “Beşiktaş”la 3 milyon avroya razılaşan Fernando Santuşun AFFA-dan da o qədər, bəlkə daha çox istəyəcəyinə isə heç şübhə etməyə dəyməz. Adam bizimkilərin qara qaş-gözünə aşiq olmayıb ki, yaşının bu vaxtında Azərbaycanda yaşamağa və işləməyə razılaşsın. Onu bura gətirən AFFA-nın verəcəyi milyonlardı. Biz o milyonların qarşılığında nə alacağıq? Bax, bu suala cavab vermək çox çətindi. Berti Foqtsla başlayan prosesin davamıdı. Bir növ dejavü yaşayırıq. Amma heç kefimizi pozmuruq. Alsınlar, aparsınlar. AFFA-nın əcnəbilərə münasibətdə səxavətli davranması bu günün hadisəsi deyil. Təəssüf ki, bu siyasət hələ də davam edir.

AMAL