Yığmanın baş məşqçisi Fernando Santuş Belarusla matçdan sonra keçirilən mətbuat konfransında maraqlı açıqlamalarla yadda qaldı. Portuqaliyalı mütəxəssis ona ünvanlanan tənqidi suallardan ustalıqla yayınmaqla yanaşı, AFFA-nı hədəf göstərdi, futbolçularına isə "toz qondurmadı".

Təbii ki, yığmamızın uğursuz nəticələrinin yeganə günahkarı Santuş deyil. Amma bu onun mələk olması mənasına da gəlmir. Baş məşqçi də günahkarlar sırasındadı. Bu üzdən məsuliyyət daşıyır və yaxasını bu şəkildə tam qırağa çəkmək haqqı yoxdu!

Bunu əsaslandırmaq üçün Santuşun təyinatından sonra yığmamızın statistik göstəricilərinin hansı yöndə dəyişdiyinə nəzər salmaq kifayətdi. Bilindiyi kimi, millimiz portuqaliyalı mütəxəssisin rəhbərliyi altında 8 oyun keçirib. Lakin ilk növbədə yığmamızın onun təyinatından əvvəl keçirdiyi son 8 matçı xatırlayaq.

13 oktyabr. AÇ. Estoniya - Azərbaycan 0:2
16 oktyabr. AÇ. Azərbaycan – Avstriya 0:1
16 noyabr. AÇ. Azərbaycan - İsveç 3:0
19 noyabr. AÇ. Belçika - Azərbaycan 5:0
22 mart. FİFA Series. Azərbaycan - Monqolustan 1:0
25 mart. FİFA Series. Azərbaycan - Bolqarıstan 1:1
7 iyun. YO. Albaniya - Azərbaycan 3:1
11 iyun. YO. Azərbaycan - Qazaxıstan 3:2

Xatırladaq ki, yığmamızı qeyd olunan Avropa çempionatı oyunlarına Canni de Byazi, qalan matçlara isə müvəqqəti baş məşqçi Arif Əsədov çıxarıb. Göründüyü kimi, millimiz bu görüşlərdən 4-də qələbə qazanıb, 1-də heç-heçə edib, 3-də isə uduzub. 8 matçda 11 qol vuran komanda qapısında 12 top görüb.

İndi Santuşun təyinatından sonrakı nəticələrə baxaq.

5 sentyabr. ML. Azərbaycan – İsveç 1:3
8 sentyabr. ML. Slovakiya – Azərbaycan 2:0
11 oktyabr. ML. Estoniya – Azərbaycan 3:1
14 oktyabr. ML. Azərbaycan – Slovakiya 1:3
16 noyabr. ML. Azərbaycan – Estoniya 0:0
19 noyabr. ML. İsveç – Azərbaycan 6:0
22 mart. YO. Azərbaycan - Haiti 0:3
25 mart. YO. Bakı. Azərbaycan - Belarus - 0:2

7 məğlubiyyət, 1 heç-heçə... 8 oyunu əhatə edən qələbə həsrəti öz yerində, millimiz son 4 matçda qol vura bilməyib. Ümumiyyətlə, komanda portuqaliyalının rəhbərliyi altında meydana çıxdığı qarşılaşmalarda 3 qol vurub, 22 qol buraxıb.

Rəqəmlər yalan danışmır. Bəli, uğursuzluğun məsuliyyətini yalnız Santuş daşımır. Amma təyinatından sonra dəfələrlə pisləşən nəticələrdə pay sahibi olmaya bilməz!

KƏNAN BAHADIR