Bilindiyi kimi, ölkəmizin U-21 yığması sentyabrın 9-da Avropa çempionatının seçmə mərhələsinin 2-ci tur matçında Bolqarıstanla heç-heçə etdi – 1:1.

“Dişimizə görə” olan rəqibə “doğma divarlar” arasında qalib gələ bilməmək öz yerində. Oyunun keçirildiyi “Lov Bona Dea Arena”nın ot örtüyünün xoşagəlməz durumu ürək ağrıtdı. Oyunu izləyən hər kəs qazonun istifadəyə yararsız olduğunu gördü.
Maraqlıdı, bəs, ot örtüyünün baxımsız qalmasının səbəbi nədi? Yaxın günlərdə bu biabırçılığın aradan qaldırılması mümkün olacaqmı?

Bu suallarla adı çəkilən idman qurğusunun baş meneceri Rəhim Məmmədova zəng etdik. İş ondadı ki, özümüzü təqdim edib sualları ünvanlayandan sonra qarşı tərəf dəstəyi asdı və sonradan edilən zəngləri cavablamaqdan boyun qaçırdı!

Təbii ki, belədə ağla başqa suallar gəlir: AFFA-nın və “Liv Bona Dea” hospitalının ayırdığı vəsait niyə ot örtüyünün təkmilləşdirilməsi üçün xərclənmir? Avropa çempionatı kimi mötəbər turnir matçının belə ot örtüyündə keçirilməsi Azərbaycanın və AFFA-nın imicini korlamırmı? Ən əsası: media nümayəndəsinin sualını cavablamaqdan imtina etməyin daha etik qaydası yoxdumu?

KƏNAN BAHADIR