Mayın 30-da ölkənin əsas və U-21 yığmaları arasında yoldaşlıq görüşü keçiriləcəyini yazmışdıq.

AFFA-nın Mətbuat və İctimaiyyətlə Əlaqələr departamentinin rəhbəri Elnur Məmmədli saytımıza açıqlamasında hər iki tərəfin bu oyunun keçirilməsində maraqlı olduğunu demişdi. İş ondadı ki, federasiyanın saytında dünənki matçın harda keçirildiyi, hansı hesabla nəticələndiyi haqda xəbərə rast gəlmədik.

Oyun baş tutmayıb, yoxsa qurum detalları ictimaiyyətə açıqlamaqda maraqlı olmayıb?

Bu suallarla Elnur bəyə müraciət etdik. O, "Football-plus.az"a açıqlamasında görüşün dünən "Liv Bona Dea Arena"da olduğunu və əsas millimizin 3:0 hesablı qələbə qazandığını dedi. Əsas yığmanın qollarını Elvin Bədəlov, Mahir Emreli və Emin Mahmudov vurub. AFFA-nın saytında xəbər yerləşdirilməməsinin səbəbi isə matçın media nümayəndələri üçün qapalı olmasıymış.

Xatırladaq ki, əsas yığma iyunun 7-də Riqadakı “Skonto” stadionunda Latviyanın, iyunun 10-da “Liv Bona Dea Arena”da Macarıstanın, U-21 isə iyunun 4-də Minskdə yerləşən Baranoviçi şəhər stadionunda Belarusun, iyunun 8-də isə Mehdi Hüseynzadə adına Sumqayıt şəhər stadionunda Monteneqronun müvafiq yaş qrupundan ibarət komandalarıya yoldaşlıq oyunları keçirəcək.

KƏNAN BAHADIR