Bu mövsüm Türkiyəni avrokuboklarda təmsil edəcək İstanbul nəhənglərinin UEFA-ya göndərdikləri iştirak ərizələri bəlli olub.

Xatırladaq ki, ''Qalatasaray'' Çempionlar Liqasının, ''Fənərbaxça'' isə Avropa Liqasının əsas mərhələsində iştirak edəcək. ''Qalatasaray''ın iştirak ərizəsində ciddi sürpriz yoxdu. Son transferlər - Uğurcan Çakır, İlkay Gündoğan və Uilfrid Sinqonun adı ərizəyə daxil edilib. Durumu ən çox maraq doğuran futbolçu Barış Alpər Yılmaz idi. Məlum olduğu kimi bu istedadlı futbolçu Səudiyyə Ərəbistanından çox sərfəli təklif aldığı üçün klubdan ayrılmaq arzusunda idi. Baş məşqçi Okan Burukun qərarı ilə Barış son iki rəsmi oyunda iştirak etməmişdi. Amma belə görünür, bu məsələ artıq yoluna qoyulub. Rəhbərlik futbolçunu komandada qalmağa razı sala bilib. Çünki onun da adı UEFA-ya göndərilən siyahıya salınıb.

Türkiyə mətbuatının yazdığına inansaq, 24 yaşlı universal futbolçunun illik maaşı 2 milyon avrodan 5 milyon avroya yüksəldiləcək. ''Sarı-qırmızılar''ın ÇL macərası sentyabrın 18-də səfərdə Frankfurt ''Ayntraxt''ına qarşı oyunla başlayacaq.

''Fənərbaxça''ya gəlincə, son transferlər Kərəm Aktürkoğlu, Ederson, Edson Alvares, Marko Asensio və Nene Dorgelesin adı gözlənildiyi kimi iştirak ərizəsinə salınıb. Əsas sürpriz Mərt Hakan Yandaş ilə bağlıdı. Təcrübəli yarımmüdafiəçinin adı iştirak ərizəsinə salınmayıb. Halbuki Mərt bu mövsüm komandanın 1-ci kapitanı statusuna gətirilmişdi! Mərtdən başqa Rodriqo Bekao, Oqnen Mimoviç, Bartuğ Elmaz, Levent Mercan və Cengiz Ündərin də adı siyahıda yoxdu. Yəni bu futbolçular ən azı yanvara qədər avrokubok oyunlarında meydana çıxa bilməyəcəklər.

Joze Mourinyo ilə yolları ayırdıqdan sonra hələ ki, yeni məşqçi tapa bilməyən ''sarı-lacivərdlilər''in AL macərası sentyabrın 24-də Zaqrebdə ''Dinamo''ya qarşı oyunla başlayacaq.