“Qalatasaray”ın Çempionlar Liqasının təsnifatının pley-off mərhələsi üçün UEFA-ya göndərdiyi iştirak ərizəsi bəlli olub.

Məlum olduğu kimi ''Cim-Bom'' bu mərhələdə ''Yanq Boyz''la qarşılaşacaq. İlk oyun avqustun 21-də İsveçrədə, cavab oyunu avqustun 27-də İstanbulda keçiriləcək. Okan Burukun qərarı ilə iştirak ərizəsinə 4 futbolçunun adı daxil edilməyib. Bunlar Eyup Aydın, Serxio Oliveyra Yusuf Dəmir və Xəlil Dərvişoğludu. Bu futbolçular zatən əsas heyət üzvü sayılmır və onlardan bəzilərinin transfer dönəminin sonuna qədər komandadan ayrılacağı gözlənilir. Əsas sürpriz isə Uilfrid Zaha ilə bağlıdı.

Təcrübəli futbolçu komandadan ayrılmaq üzrə olsa da, onun adı iştirak ərizəsinə salınıb. Xatırladaq ki, Türkiyə çempionatının ilk turundan öncə Okan Buruk Zahanın İngiltərəyə qayıtmaq istədiyini və danışıqlar apardığını etiraf etmişdi. Bu futbolçunun adı superliqada ilk iki turun heç birində iştirak ərizəsinə salınmayıb. Zaha əsasən ''Lester''in gündəmində olsa da, tərəflərin hələ ki, maaş məsələsində anlaşa bilmədiyi iddia olunur.

ƏLİ