“Bəhramov” Çempionlar Liqasına qədər hazır olacaq?
“Ferentsvaroş”la cavab oyununda Tofiq Bəhramov adına stadionun qazonunun hansı vəziyyətdə olduğunu hər kəs gördü.
Oyundan bir gün əvvəl meydançanın biabırçı vəziyyətdə olduğunu bildirmişdik. Qazon sapsarıdı. Oyunun gedişində ən kiçik mübarizə anında belə qazonun qopuq-qopuq olduğunu gördük. Bundan başqa, oyunun gedişində futbolçular tez-tez sürüşür, yıxılırdı. Maraqlıdı ki, belə hallar daha çox “Qarabağ”ın futbolçularının başına gəlirdi. Xüsusən də Leandro Andradenin.
“Qarabağ” artıq Çempionlar Liqasının əsas mərhələsindədi, oktyabrın 1-də ilk ev oyununa çıxacaq. Bu bir ay ərzində qazonun vəziyyəti tam düzələcəkmi? Hə, bir də futbolçuların tez-tez yıxılmasının səbəbi nə idi? Sualları klubun Kommunikasiya departamentinin rəhbəri Anar Hacıyevə ünvanladıq:
“Futbolçuların sürüşməsinin səbəbini konkret deyə bilmərəm. Həmişə baş verən hadisədi. Qazona gəlincə, təbii ki, klubumuzun bu sahə üzrə çalışan yetərincə mütəxəssisi var. Çalışacağıq ki, oyunlara qədər ideal vəziyyətə gətirilsin. Bunun üçün əlimizdən gələni edəcəyik. Onsuz da biz bu məsələyə həmişə həssas yanaşmışıq. Yenə də ən yaxşısının olması üçün hər şey edəcəyik. Bu yöndə işlər görülür. Bu məsələ diqqət mərkəzimizdədi. Mütəxəssislərimiz də əlindən gələni edəcək ki, bu məsələni ən yaxşı formada yoluna qoysunlar”.
MÜZƏFFƏR QULUZADƏ
Digər xəbərlər
