Çempionlar Liqasının əsas mərhələsində oynayacaq “Qarabağ” yeni hücumçu transfer etmədi. Etmədi, yoxsa edə bilmədi? Məncə, hər iki cavab doğrudu.

Futbol ictimaiyyətinin bu klublar bağlı gözləntiləri o dərəcə yüksəkdi ki, artıq “Qarabağ”a transfer etməməyi bağışlamır. Əslində transferlər oldu, xeyli oldu. Amma mərkəz hücumçusu alınmadı. Son günlərdə Sambu və Juninyo variantları prioritet idi. Qurban Qurbanov da mətbuat konfransında bunu təsdiqləmiş, lakin danışıqların çox ağır getdiyini demişdi. Hər halda, dünən gecəyə qədər ümid var idi. Lakin “Flamenqo” Juninyonu icarəyə vermədi, transfer olunması üçün 4 milyon avro istədi. Elə Sambu ilə bağlı “Loryan”ın 4 milyon avro tələbi də “Qarabağ” tərəfindən qəbul olunmadı. Normaldımı? Bəli. Yəqin ki, maaş məsələləri də var.

20 ilə yaxındı qurulan sistem bir futbolçuya görə pozulmamalıdı. Heç kimin “Qarabağ”dan “8-lik”, “24-lük” gözləntisi yoxdu. Bu komanda da xal və ya xallar qazanmaqla uğura izma ata bilər. Çətin də olsa, bacarar. Bunun üçün klubdaxili balansı pozmağa ehtiyac yoxdu.

Adı çəkilən futbolçulardan əlavə, Pako Alkaser, Adnan Yanuzay kimi futbolçular “Qarabağ”a təklif olundu, Andre Klovis üçün isə bir aya yaxın davam edən danışıqlar uğursuz başa çatdı.

MÜZƏFFƏR QULUZADƏ