Məlum olduğu kimi, "Qarabağ" bu gün Çempionlar Liqası üçün sifariş ərizəsini UEFA-ya göndərəcək. Ərizədə əsas mərhələdə oynayacaq futbolçuların adları yer alacaq. Adlar Bakı vaxtıyla gecə saat 03.00-dək təhvil verilməlidi.

Təbii ki, bu durumda "köhlən atlar"dan gözlənilən yeganə addım hücum xəttinin legioner futbolçuyla gücləndirilməsidi. İndiyə qədər Ağdam təmsilçisinin Çerif Ndiaye ("Srvena Zvezda", Serbiya), sabiq futbolçusu Juninyo ("Flamenqo", Braziliya) və Sambu Samanoyla ("Loryan", Fransa) danışıqlar apardığı bəlli idi. Bəs, bu məsələlər nə yerdə qaldı? "Qarabağ"ın yerli futbol ictimaiyyətini son dəqiqədə transfer xəbəriylə sevindirmək ehtimalı varmı?

Bu suallarla Ağdam təmsilçisinin İdarə Heyətinin üzvü Asif Əsgərova müraciət etdik. Klub rəsmisi "Football-plus.az"a açıqlamasında oyunçuların məxsus olduğu klubların "Qarabağ"ın təkliflərinə isti yanaşmadıqlarını bildirdi. Söz düşmüşkən, Asif bəydən sövdələşmələrin baş tutmamasının maddi səbəblərlə bağlı olub-olmadığını da soruşduq. O, razılaşmaya mane olan məqamların bu məsələylə əlaqədar olmadığını, əlavə 3-4 futbolçuyla aparılan danışıqların da qarşı tərəflər üzündən uğursuz nəticələndiyini bildirdi.

Xatırladaq ki, "Qarabağ" əsas mərhələdə ilk oyununu sentyabrın 16-da Portuqaliya "Benfika"sının meydanında keçirəcək.

KƏNAN BAHADIR