“Yuventus” son günlər bir neçə transfer əməliyyatını reallaşdırıb. Turin klubunu iki oyunçu tərk edib, bir futbolçu isə “ağ-qaralar”a qoşulub.

"Football-plus.az" xəbər verir ki, “Yuventus”un futbolçusu Nikolas Qonsales “Atletiko”ya keçib. Bu barədə hər iki klubun mətbuat xidməti məlumat yayıb.

Madrid təmsilçisinin rəsmi saytı 27 yaşlı vingerin icarəyə götürüldüyünü xəbər verib. Turin klubu futbolçunun keçidinə görə 1 milyon avro alacağını, bu məbləğin 2 milyona yüksələ biləcəyini açıqlayıb. Argentinalı futbolçu ötən mövsüm A seriyasında 26 oyun keçirib, 3 qol vurub və 2 məhsuldar ötürmə verib.

“Yuventus”a qoşulan futbolçu isə Loi Opendadı. “Leyptsiq”in hücumçusu İtaliya nəhənginə birilliyə icarəyə verilib. Buna görə almaniyalılara 4 milyon avro ödəyən Turin klubu gələn yay futbolçunu 47 milyon avroya almağa borcludu. Tərəflərin imzaladığı müqavilədə müxtəlif bonuslar və Loinin sonrakı satışından əldə olunacaq vəsaitin bir hissəsinin “Leyptsiq”in xəzinəsinə köçürməsi də nəzərdə tutulub.

O, Almaniya klubuna 2023-cü ildə “Lans”dan 40 milyon avroya transfer olunub. Opendanın bundesliqanın son mövsümündə meydana çıxdığı 33 oyunda 9 qolun və 5 məhsuldar ötürmənin müəllifi oduğunu da yada salaq.

Turini Nikola Savona da tərk edib. “Nottingem Forest” müdafiəçini birdəfəlik transfer edib. Futbolçu yeni klubu ilə 5 illik müqavilə imzalayıb. Bu barədə İngiltərə klubunun rəsmi saytı məlumat yayıb. Nottingemlilər transfer üçün 13 milyon avro ödəyib.

Qeyd edək ki, Savona ötən mövsüm “Yuventus”la 37 matça çıxb, 2 qol vurub və 1 məsuldar ötürmə verib.