Avropa Çempionatının yekunlarına əsasən ən güclü 8 komanda arasına düşən Türkiyə yığmasının Millətlər Liqası macərası start götürür.

Qardaş ölkənin komandası B Liqasının 4-cü qrupunda yer alır. ''Ay-ulduzlular''ı sentyabrın 6-da səfərdə Uels, sentyabrın 9-da isə evdə İslandiya ilə oyunlar gözləyir. Bu arada baş məşqçi Vinçentso Montella qarşıdakı oyunlar üçün heyəti müəyyənləşdirib.

28 nəfərlik siyahıda ''Beşiktaş''lı Əmirhan Topçu ilə Mustafa Həkimoğluya, eləcə də ötən mövsüm ''Haydenhaym''da ulduzu parlayan, bu mövsüm isə ''Frayburq''da çıxış edən Ərən Dinkçiyə də yer tapılıb. Bu futbolçular ilk dəfə yığmaya dəvət alıb. Ahmetcan Kaplan, Doğan Ələmdar, Enes Ünal, Fərdi Kadıoğlu, Ozan Kabak və Rıdvan Yılmaz zədə üzündən yığmadan kənar qalıb.

Sonda tam siyahını təqdim edirik:

qapıçılar - Altay Bayındır (Mançester Yunayted), Mərt Günok (Beşiktaş), Muhammed Şengezər (İstanbul BŞ), Uğurcan Çakır (Trabzonspor);

müdafiəçilər - Çağlar Söyüncü, Mərt Müldür, Samet Akaydın (hamısı ''Fənərbaxça''), Əbdülkərim Bardakcı, Kaan Ayhan (hər ikisi ''Qalatasaray''), Əmirhan Topçu (Beşiktaş), Ərən Elmalı (Trabzonspor), Zəki Çəlik (Roma), Merih Dəmiral (Əl-Əhli);

yarımmüdafiəçilər - Hakan Çalhanoğlu (İnter), İsmayıl Yüksək, İrfan Can Kahveci (hər ikisi ''Fənərbaxça''), Okay Yokuşlu (Trabzonspor), Orkun Kökçü (Benfika), Salih Özcan (Volfsburq), Arda Gülər (Real), Kərəm Aktürkoğlu (Qalatasaray), Can Uzun (Ayntraxt F), Ərən Dinkçi (Frayburq);

hücumçular - Barış Alpər Yılmaz (Qalatasaray), Kənan Yıldız (Yuventus), Mustafa Həkimoğlu, Semih Kılıçsoy (hər ikisi ''Beşiktaş''), Umut Nayır (Konyaspor).

ƏLİ