Məlum olduğu kimi, qarşıdan yığma həftəsi gəlir.

Qardaş Türkiyə yığması da Millətlər Liqasında növbəti oyunlarını keçirəcək. Qrupda ilk iki oyunda 4 xal toplayan “ay-ulduzlular” oktyabrın 11-də Samsunda Monteneqro ilə qarşılaşacaq. Oktyabrın 14-də isə türkləri Reykyavikdə İslandiya ilə oyun gözləyir. Maraq üçün bildirək ki, Türkiyə indiyə qədər İslandiyaya qarşı səfərdə keçirdiyi 7 oyunun hamısında qələbəyə həsrət qalıb (1 heç-heçə, 6 məğlubiyyət)! Vinçentso Montellanın müəyyənləşdirdiyi budəfəki 27 nəfərlik siyahıda əsas yenilik Atakan Karazor ilə bağlıdı.

Bir müddət öncə “Ştutqart”ın qürbətçi futbolçusunun almanların baş məşqçisi Yulian Naqelsmannın təklifini geri çevirərək Türkiyəni seçməsi barədə xəbərlər yayılmışdı. Göründüyü kimi, bu xəbərlər təsdiqini tapıb və 28 yaşlı yarımmüdafiəçi ilk dəfə Türkiyə yığmasına dəvət alıb. Bundan başqa, siyahıda “Eyüpspor”lu Ahmed Kutucunun da adının olması diqqəti çəkir. Karyerasının əvvəllərində böyük gələcək vəd edən, amma sonradan gözdən itən 24 yaşlı forvard sonuncu dəfə 2020-də yığmaya çağırılmışdı. Cenk Özkacar, Çağlar Söyüncü, Doğan Aləmdar və Ozan Kabak zədə üzündən siyahıya salınmayıb. Amma Türkiyə zədə üzündən daha bir neçə futbolçunun xidmətindən məhrum ola bilər. Məsələn, adı siyahıda olanlardan Mərt Günok “Beşiktaş”ın “Ayntraxt”a qarşı matçını məhz zədə üzündən buraxmışdı. Eləcə də Portuqaliya karyerasına fırtına kimi başlayan Kərəm Aktürkoğlunun “Atletiko”ya qarşı son oyunda yüngül zədə aldığı deyilir.

Portuqaliya mətbuatının iddiasına görə, onun bir neçə günlük istirahətə ehtiyacı var. Sonda siyahını təqdim edirik:

qapıçılar – Mərt Günok (Beşiktaş), Uğurcan Çakır (Trabzonspor), Altay Bayındır (Mançetser Yunayted), Muhammed Şengezər (İstanbul BŞ); müdafiəçilər – Əbdülkərim Bardakcı (Qalatasaray), Əmirhan Topçu (Beşiktaş), Mərt Müldür, Samet Akaydın (hər ikisi “Fənərbaçxa”), Ərən Elmalı (Trabzonspor), Fərdi Kadıoğlu (Brayton), Merih Dəmiral (Əl-Əhli), Zəki Çəlik (Roma); yarımmüdafiəçilər – Arda Gülər (Real), Atakan Karazor (Ştutqart), Hakan Çalhanoğlu (İnter), İsmayıl Yüksək, İrfan Can Kahveci (hər ikisi “Fənərbaxça”), Okay Yokuşlu (Trabzonspor), Kaan Ayhan, Yunus Akgün (hər ikisi “Qalatasaray), Kərəm Aktürkoğlu, Orkun Kökçü (hər ikisi “Benfika”); hücumçular – Barış Alpər Yılmaz (Qalatasaray), Ahmed Kutucu (Eyüpspor), Bertuğ Yıldırım (Xetafe), Semih Kılıçsoy (Beşiktaş), Kənan Yıldız (Yuventus).