Türkiyə yığmasının qarşıdakı oyunlar üçün heyəti açıqlanıb.

''Ay-ulduzlular'' Millətlər Liqasında noyabrın 16-da evdə Uels, noyabrın 19-da isə səfərdə Monteneqro ilə qarşılaşacaq. Baş məşqçi Vinçentso Montella tərəfindən müəyyənləşdirilən 28 nəfərlik bu dəfəki siyahıda iki debütant var. Söhbət Dəniz Gül və Doğucan Haspolatdan gedir. İsveçdə doğulan və bu yay 4,5 milyon avroya ''Portu''ya transfer olunan Dəniz Gülün yığmaya çağırılacaği barədə son dönəmlər Türkiyə mətbuatında bir çox xəbərlər yazılmışdı. 19 yaşlı forvardın İsveçin U-19, U-20, U-21 yığmalarında oynamasına baxmayaraq Türkiyə yığmasına üstünlük verdiyi məlum olmuşdu. 2000-ci il təvəllüdlü Haspolat isə Niderlandda doğulub və karyerasına ''Ekselsior''da başlayıb. Dayaq yarımmüdafiəçisi mövqeyində oynayan Haspolat Türkiyədə ''Kasımpaşa'' və ''Trabzonspor''un şərəfini qoruduqdan sonra ötən ilin yayında Belçika təmsilçisi ''Vesterlo''ya transfer olundu. Bu mövsüm o, ''Vesterlo''da 13 rəsmi oyunda 1 qol, 2 məhsuldar ötürmə ilə fərqlənib. 24 yaşlı futbolçu daha öncə 14 dəfə Niderlandın U-17, 6 dəfə Niderlandın U-18 və 5 dəfə Türkiyənin U-21 yığmasının şərəfini qoruyub.

Onu da bildirək ki, Doğan Aləmdar, İrfan Can Kahveci, Ozan Kabak və Yusuf Yazıcı zədə üzündən bu dəfə yığmadan kənar qalıb. Sonda tam siyahını sizə təqdim edirik:

qapıçılar - Altay Bayındır (Mançester Yunayted), Mərt Günok (Beşiktaş), Uğurcan Çakır (Trabzonspor), Muhammed Şengezər (İstanbul BŞ); müdafiəçilər - Əbdülkərim Bardakcı, Kaan Ayhan (hər ikisi ''Qalatasaray''), Çağlar Söyüncü, Mərt Müldür, Samet Akaydın (hamısı ''Fənərbaxça''), Əmirhan Topçu (Beşiktaş), Ərən Elmalı (Trabzonspor), Fərdi Kadıoğlu (Brayton), Merih Dəmiral (Əl-Əhli), Zəki Çəlik (Roma); yarımmüdafiəçilər - İsmayıl Yüksək - (Fənərbaxça), Yunus Akgün (Qalatasaray), Hakan Çalhanoğlu (İnter), Doğucan Haspolat (Vesterlo), Okay Yokuşlu (Trabzonspor), Kərəm Aktürkoğlu, Orkun Kökçü (hər ikisi ''Benfika''), Arda Gülər (Real), Kənan Yıldız (Yuventus); hücumçular - Barış Alpər Yılmaz (Qalatasaray), Semih Kılıçsoy (Beşiktaş), Ahmed Kutucu (Eyüpspor), Enes Ünal (Bornmut), Dəniz Gül (Portu).

ƏLİ