1-ci liqa klublarının hamısı mövsümöncəsi hazırlığa start verib. Artıq sentyabrın 11-də yeni mövsüm start götürəcək. Bəs klublar mübarizəyə nə dərəcədə hazırdı?

Ötən mövsüm elitada çıxış edən “Səbail” 1-ci liqa səviyyəsində də ciddi transferlər edib. Heyətdə keyfiyyətli futbolçu çoxdu. “Dənizçilər” liqanın aşkar favoritidi. Lakin Bayıl təmsilçisinin bir neçə rəqibi də olacaq. Məsələn, “Mingəçevir”, “Şəfa”, “Zaqatala”, “Baku Sportinq”. Yüksək yerlər uğrunda xeyli komanda mübarizə aparacaq. Ötən mövsüm də belə idi. Təsadüfi deyil ki, mövsümün ortasında 9-cu olan “Mingəçevir” finişə 4-cü, 5-ci olan “Baku Sportinq” 8-ci yerdə çatdı. Buzovna təmsilçisinin eyniadlı qəsəbədə bazası var. Məskunlaşıblar, məşq edirlər. Bəzi elita klublarından fərqli belə problemləri yoxdu.

“Şəfa” da Qəbələdə yaxşı təlim-məşq toplanışı keçdi. Maliyyə problemi də yoxdu. Klubda vəziyyət ideala yaxındı. Ən azı ötən mövsüm çempionluğa mane olan “Şahdağ Qusar”dan xeyli irəlidə olacaqlarıma şübhə yoxdu.

“Mingəçevir” də yaxşı transferlər edib. Maddi dayaq yerindədi. Füzuli Məmmədovun olmaması uğuru müəyyən qədər şübhə altına ala bilər, amma Ramiz Məmmədov da bacarığına görə ondan geri qalmır.
İddialılar arasında ən iddiasız isə “Zaqatala”dı. “Music Gallery” klubdan əlini çəkdi, qaldılar yetim. AFFA-nım hesabına nə olacaqsa, olacaq.

Ümumi mənzərə baxımından “Səbail” elitaya başqalarından bir addım daha yaxın görünür. Səbəbi də bəllidi.

MÜZƏFFƏR QULUZADƏ