Gələn mövsüm də 1-ci liqanın maraqlı olacağını gözləyirik. Bunu gözləmək üçün əsaslar da çoxdu.

Düzdü, ötən mövsüm "Qəbələ"nin ilk turlardan dominantlıq etməsi, uzun müddət məğlubiyyətsiz irəliləməsi, əsasən elitaya qalan iki vəsiqə uğrunda gərgin mübarizə getməsi bu liqaya ümumi marağı azaltmışdı. Gələn mövsüm isə ən azı dörd komandanın zirvəyə iddia edəcəyini deyə bilərik.

Birincisi elə "Səbail"di. Premyer-liqadan yuvarlanan Bayıl təmsilçisinin favoritlərdən olacağı şübhə doğurmur. Həm pis-yaxşı sponsoru, həm də normal infrastrukturu var. 2-ci liqada son ana qədər çempionluq mübarizəsi aparan "Şahdağ Qusar"la "Şəfa" da favoritlər arasında olacaq. Amma Qusar təmsilçisi ilə bağlı müəyyən şübhələrimiz də var. Komandanın baş məşqçisi Elnur Abdullayev və kapitanı Rahid Əmirquliyev hələ ki hədəfin bəlli olmadığını deyir. "Şahdağ Qusar"ın sabiq prezidenti Elçin Cananovla da iki dəfə əlaqə saxlamışıq, iclasın olacağını, yekun qərarların orda veriləcəyini veriləcəyini deyib.

Açığı, 1-ci liqada mübarizəyə ən həvəsli hazırlaşan klub elə "Şəfa"dı - istər transferləri ilə, istərsə də heyəti ilə. Qapında milliyə belə çağrılan biri, hücumda 1-ci liqa səviyyəsində, bəlkə də daha üstün futbolçu. Əlbəttə, Amil Yunanovu nəzərdə tuturam. Paytaxtın zəngin ənənələrəmalik klubu indiyə qədər “İmişli”dən Xəyal Tomarovu, “Səbail”dən Əlirza Müştəbazadə ilə Nihad Quliyevi transfer edib. Klubdan verilən açıqlamalardan da iddia yağır. “Şəfa” hazırda ehtiyac duymadığı futbolçuları göndərməklə məşğuldu. Paytaxt təmsilçisi artıq 15 futbolçu ilə yolları ayırıb.

Ötən mövsümün sonlarında 4-cü pilləyə qədər yüksələn, gələn mövsümdən sponsorla oynayacaq "Mingəçevir" də iddialılardandı. Füzuli Məmmədov təcrübəsi hesabına komandaı elitaya çıxara bilər. Həm sponsor, həm də şərait buna imkan verir. Nəzərə alaq ki, "Neftçi"nin son çempionluğunda yayda komandanı yığan məşqçi elə Füzuli Məmmədov olub. Komanda rəsmən iki futbolçu ilə vidalaşıb, transfer xəbəri yoxdu.

Əslində sponsor problemi yaşamasaydı, "Zaqatala" da bu siyahıda ola bilərdi. Təəssüf ki, “Music Gallery” klubu yarıyolda qoydu. Rəhbərlik maliyyə durumunu düzəldə bilsə, yaxşı heyət qurub çempionluq mübarizəsinə qoşulmaq olar.

Açığı, 1-ci liqada ötən mövsüm 18-ci, 20-ci turlarda bitsəydi, yəqin ki, "Baku Sportinq" də iddialılardan olardı. Lakin ardıcıl 10 oyunda qələbəsizlik, qeyri-sabit oyun ümidləri azaldır. Amma Buzovna klubu da köklü dəyişikliklərə gedib, 10 futbolçu ilə yolları ayırıb, 2-ci liqada kapitanı, bombardiri olan Röyal Nəcəfovu gətirib.

Düzdü, 1-ci liqada mövsüm avqustda yox, sentyabrda başlayacaq. Odu ki, burda yarışacaq klubların vəziyyəti düzəltmək üçün yetərincə vaxtı var.

Autsayderlərə gəlincə, yəqin ki, MOİK, "Cəbrayıl" və "Difai" 1-ci liqada qalmaq uğrunda mübarizə aparacaq.

MÜZƏFFƏR QULUZADƏ