Misli premyer-liqasının 2-ci turunun “Turan Tovuz” - “Araz-Naxçıvan” oyunu tovuzluların məğlubiyyəti ilə bitdi - 1:2.

Oyundan sonra qonaqların baş məşqçisi Elmar Baxşıyev media önünə çıxdı.

- Ağır oyun alındı. Hər iki komanda mübarizə apardı. İstədiyimizi etməyə çalışırdıq. İstədiyim komandamı gördüm. Çempionatın gedişində daha yaxşı komanda olacağıq.

- Adətən, avrokuboklarda oynayanda komanda daha hazır olur. Sizdə də buna görə komanda hazır idi?
- Düşünmürəm ki, avrokuboklar bizə müsbət və ya mənfi təsir edə bilər. Biz də boyumuzdan hündür tullanmağa çalışdıq, alınmadı. Hər mövsümün əvvəlində şayiələr yayırlar ki, məni göndərəcəklər. Onlara fikir versək, özümüzü geri salmış olarıq. Komanda olaraq istədiyimizi etməyə çalışdıq. Ümidverici oldu ki, komandam geridönüş etməyi bacarır.

- Penalti epizodu ilə bağlı fikriniz?
- Mən də planşetdən baxdım. Belə kiçik penaltilərin lehimizə də verilməsini istəmərəm. Məncə, penalti yox idi.

- “Omoniya”nı məğlub etməyi niyə boyunuzdan hündür tullanmaq kimi fikirləşirsiz?
- Siz fikirləşirsiz ki, 4-5 futbolçu aldıqsa, avrokuboklarda olacağıq. Bunun üçün təcrübə lazımdı. Gözümüzün qabağında “Qarabağ” təcrübəsi var. Komanda bunun üçün formalaşmalıdı. Biz də çalışdıq, alınmadı. Bizdən başqa komandaların da oyunları alınmadı, əsas mərhələ alınmadı.

- Ribeyronun gedişindən sonra müdafiə daha fərqli idi. İndi elə futbolçu var?
- İqor “Neftçi”nin futbolçusudu. “Barselona”nın məşqçisindən Messini soruşsalar, o da deyər ki, ehtiyac var.

MÜZƏFFƏR QULUZADƏ