Premyer-liqanın 18-ci turunda “Araz-Naxçıvan” “Qarabağ”a məğlub oldu - 0:2.

“Football-plus.az” xəbər verir ki, oyundan sonra qonaqların baş məşqçisi Elmar Baxşıyev jurnalistlərin suallarını cavablayıb.

- Yaxşı oyun alındı. Hər iki komanda hərəkətli idi. Qışa kimi göstərdiyimiz oyunlar arasında ən yaxşılardan biri idi. Məğlub olduq. Komanda olaraq, yaxşı iş gördük. Qışdan sonra üst pillələrdə yerimizi qoruyaraq, iddiamızı artıracağıq.

- Qol vursanız da, hakim qeydə almadı. Narazılıqlar var idi. Ofsayd var idi, yoxsa hakim bir xalı əlinizdən aldı?
- Mənim fikrim başqa cür yozulur, hakimlərin başqa cür. Ötən oyunda da penalti var idi. Bizə görə belə idi, onlara görə fərqli. Futbolda olan şeydi. Bununla barışmaq lazımdı. Amma qərarı verən onlardı. Hörmətlə yanaşırıq.

- "Araz-Naxçıvan"ın bu mövsümdəki nəticələri bir çoxları üçün gözlənilməzdi. Özünüz üçün də belədi?
- Heç kim inanmasa da, bu komandanı mən yığmışam və futbolçuları yığanda da potensialına bələd idim. Yaxşı oyunçularımız var. Qələbələrə ac futbolçulardı. Oyun planında desəm ki, bu komandanı istəyirəm, yox. Daha yaxşı, daha kreativ ola bilərik. Ümid edirəm ki, qışdan sonra oyun planında daha da “artıracağıq”.

- Qış hazırlığı ilə bağlı planlar necədi? Ölkə xaricinə gedəcəksiz?
- Ölkədə qalacağıq. Vaxt az olduğundan, qısa olduğundan burda olacağıq.

- Futbolçu gətirəcəksiz, ya da göndərəcəksiz?
- Çox geniş heyətimiz yoxdu. Yeni futbolçular ola bilər. İstədiyim tipdə olsa, güclənməyə həmişə hazırıq.

RÖYANƏ OĞUZ