23 yaşlı basketbolçu Den Mayar ABŞ-nin Yuta ştatında su anbarında faciəvi şəkildə həyatını itirib.

"Daily Mail" nəşrinin məlumatına görə, NCAA tələbə liqadında çıxış etmiş idmançı dostu ilə birlikdə Solt Leyk Sitinin cənubunda yerləşən Herriman şəhərindəki "Blackridge" su anbarında olarkən bədbəxt hadisə baş verib. Bir anda hər iki gənc suda çətin vəziyyətə düşüb. Basketbolçunun dostu sahilə çıxmağı bacarıb, lakin Mayar bunu edə bilməyib.

Hadisədən sonra dostu ona kömək etmək üçün suya qayıtsa da, artıq gec olub. Mayar suyun dibinə enib və bir daha üzə çıxmayıb.

Axtarış-xilasetmə əməliyyatı nəticəsində onun cəsədi tapılıb. Dostu isə xəstəxanaya yerləşdirilib və vəziyyətinin sabit olduğu bildirilir.

Mayar ötən mövsüm Şimali Dakota Universitetinin komandasında çıxış etmişdi. O, növbəti çempionatda Nebraska Omaha Universitetinin şərəfini qoruyacaqdı…