Beləliklə, “Qarabağ”da qış “transfer pəncərəsi”ndə ikinci ayrılıq yaşandı: klub Julio Romaoyla qarşılıqlı razılıq əsasında müqaviləyə xitam verdi. “Köhlən atlar”ın dünən sabiq futbolçusu Kadi Borgesi transfer etdiyini də bilirik.

Romao artıq “Ferenstvaroş”a keçib. Maraqlıdı ki, Borges də “Qarabağ”a elə həmin klubdan gəlib. Hər halda, başverənlər təsadüf deyil. Düzdü, artıq bu haqda müəyyən iddialar var. Dəqiq desək, bəzi mətbuat orqanları “Qarabağ”ın Romaonu Kadiylə dəyişdiyini iddia edir. İş orasındadı ki, UEFA-nın müvafiq qaydalarına əsasən bu şərtlər daxilində futbolçu transferi mümkün deyil. Burda proses səmimi münasibətlər və qeyri-rəsmi razılaşmalar sayəsində irəliləyə bilər. Məsələ də elə bundan ibarətdi.

“Football-plus.az”ın əldə etdiyi məlumata görə, ötən yay Kadinin transferiylə bağlı “Krasnodar”la razılığa gəlməkdə çətinlik çəkən, macarlardan daha çox pul təklif etsə də, istəyinə nail ola bilməyən klub bu dəfə məqsədinə baş menecer Asif Əsgərov sayəsində çatıb. Avropa Klublar Birliyinin İcraiyyə Şurasının üzvlərindən olan funksioner bu sayədə “Ferentsvaroş” rəsmilərindən biriylə səmimi dostluq münasibəti yaradıb ki, nəticədə Borgesin transferi daha rahat yolla mümkün olub. Ağdamlılar bununla ardıcıl 4 məğlubiyyətdən sonra futbolçular üzərində yaranan ruh düşkünlüyünü aradan qaldırmaq və Kadisevərlərin arzusunu gerçəkləşdirmək niyyətinə nail olub.

Romaonun “Ferentsvaroş”a keçidi də kağız üzərində olmayan sövdələşmənin bir parçasıdı. Hər iki futbolçu müqaviləyə qol çəkməzdən əvvəl azad agent statusu daşıdığından burda maddi məsələlərin üzərində baş sındırmağa ehtiyac yoxdu. O bəllidi ki, “Qarabağ” bu işdən daha qazanclı çıxıb.

KƏNAN BAHADIR