"Sabah" qapıçı problemini necə həll edəcək? - AÇIQLAMA
Növbəti mövsüm çempionluq uğrunda mübarizə aparacaq "Sabah" iyunun 27-dən təlim-məşq toplanışına start verib.
Azarkeşləri maraqlandıran suallardan biri odu ki, heyətində 4 qapıçı olan "bayquşlar"ın "1 nömrə"si kim olacaq, ən əsası Nicat Mehbalıyev komandada qalacaq, yoxsa yenə icarəyə veriləcək?
"Football-plus.az" saytı olaraq bu məsələ ilə bağlı "Sabah"ın idman direktoru və Müşahidə Şürasının üzvü İqor Ponomaryovun fikirlərini öyrəndik:
"Təlim-məşq toplanışına yeni başlamışıq. Qapıçılarımızın hamısı bizimlədi. Rüstəm Samiqullinlə yollarımızı ayıracağıq. Aleksandr Neçayev təcrübəli qapıçıdı. Gənc Yusif İmanov ötən mövsümün 2-ci yarısından özünü yaxşı tərəfdən göstərdi. Nicat Mehbalıyev "Qəbələ"də icarədə oynadığı müddətdə nəinki bölgə təmsilçisinin "1 nömrə"sinə çevrildi, hətta Azərbaycan millisinə də dəvət aldı. Heyətimizdəki qapıçıların hər biri yaxşı səviyyədədi. Bizdə hər mövqedə olduğu kimi qapı xəttində də güclü rəqabət var. Təbii ki, bütün futbolçularımızın daim oynayıb inkişaf etməsində maraqlıyıq. Nicat Mehbalıyevlə bağlı bizə rəsmi təklif gəlməyib. Qapıçılarımızdan kimin icarəyə verilib-verilməməsinə baş məşqçi qərar verəcək".
ABDULLA İSMAYILOĞLU
Digər xəbərlər
