''Qalatasaray''da Alvaro Morata ilə bağlı problem nəhayət, həllini tapdı.

Uzun müddətdi, İstanbul nəhəngindən ayrılması gündəmdə olan tanınmış ispaniyalı forvard istəyinə çatıb. Türkiyə çempionundan verilən rəsmi açıqlamada Moratanın icarə əsasında qüvvədə olan müqaviləsinin qarşılıqlı şəkildə ləğv edildiyi vurğulanılıb. Bunun qarşılığında Moratanın müqavilə ilə məxsus olduğu ''Milan'' ''sarı-qırmızılar''a 5 milyon avro ödəyəcək.

Bundan başqa təcrübəli forvard ''Qalatasaray''ın ona ödəməli olduğu 651 min avroluq məvacibdən də imtina edib. 32 yaşlı futbolçunun ən qısa müddətdə, ''Milan''dan ''Komo''ya keçəcəyi gözlənilir. Bu transfer Sesk Fabreqasın çalışdırdığı ''Komo''ya 12 milyon avroya başa gələcək.

Xatırladaq ki, ''Qalatasaray'' Moratanı bu qış ''Milan''dan 6 milyon avroya birillik icarəyə götürmüşdü. Onun icarə müddəti gələn ilin yanvarında başa çatmalı idi. Morata ''Qalatasaray''da 16 rəsmi oyuna çıxaraq 7 qol vurdu və 5 aylıq dönəmdə karyerasını iki titulla zənginləşdirdi.