Alvaro Moratanın ''Qalatasaray''da xoşbəxt olmadığı və Türkiyə çempionundan ayrılmaq istəməsi haqda xəbərlər yavaş-yavaş öz təsdiqini tapır.

Təcrübəli ispaniyalı forvard ilə bağlı mühüm bir xəbər var. Belə ki, A seriyası təmsilçisi ''Komo'' Morataya rəsmi təklif irəli sürüb. Bu xəbəri tanınmış insayder Fabritsio Romano paylaşıb.

Morata bilindiyi kimi İstanbul nəhəngində icarə əsasında çıxış edir və müqavilə ilə ''Milan''a məxsusdu. Romano paylaşımında onu da qeyd edib ki, Morata ''Qalatasaray''da qalmayacaq, amma ''Milan''a da qayıtmayacaq. ''Komo''nu bilindiyi kimi Moratanın həmyerlisi Fransesk Fabreqas çalışdırır. 32 yaşlı futbolçunun ''sarı-qırmızılar''la hələ 6 aylıq müqaviləsi var. Ona görə də Moratanın ayrılması üçün ''Qalatasaray''ın da razılığı olmalıdı.

Kluba yanvarda gələn tanınmış futbolçu indiyə qədər ''Cim-Bom''da 16 oyuna çıxaraq aktivinə 7 qol, 3 məhsuldar ötürmə yazıb.