''Qalatasaray''ın qış transfer dönəmində ''Milan''dan birillik icarəyə götürdüyü Alvaro Morata ilə bağlı yeni sürpriz xəbər var.

Belə ki, təcrübəli forvardın İstanbul nəhəngindən ayrılmaq ehtimalı günü-gündən artır. İspaniyalı futbolçu hələ çempionluğa həsr olunmuş tədbirdə Mauro İkardi ilə gərginlik yaşamışdı. Daha doğrusu, İkardinin etdiyi bir zarafat onun ciddi şəkildə xətrinə dəymişdi. Tədbirdə sona qədər də sifətindən zəhrimar yağan Morata komanda yoldaşlarının da kefini qaçırmış və İstanbulu bu cür şəkildə tərk etmişdi.

Bir çox mənbələrin yazdığına inansaq, 32 yaşlı futbolçu həm adaptasiya ilə bağlı problem yaşadığından, həm də ailəsindən ayrı qaldığından ''Qalatasaray''dan ayrılmaq istəyir. Onun model olan həyat yoldaşı Elis Kampello işi və çəkilişlərlə bağlı daha çox İspaniya və İtaliyada yaşayır. Türkiyəyə gələ bilmir. Üstəlik Morata ''Qalatasaray''da start heyətinə də düşməkdə çətinlik çəkir. Viktor Osimhen komandada qalacağı təqdirdə çox güman, onun oynamaq şansı yenə az olacaq. İstənilən halda ''Cim-Bom'' bu yay bir mərkəz hücumçusu transfer etmək niyyətindədi. Hələ üstəlik zədəsini sağaldan İkardi də heyətə dönəcək.

Türkiyə mətbuatının yazdığına inansaq, Morata Türkiyədəki bütün əşyalarını vətəninə göndərib. Ancaq burda əsas söz sahibi ''Qalatasaray''dı. Çünki Moratanın yanvara qədər ''sarı-qırmızılar''la müqaviləsi var. Türkiyə çempionu ya Moratadan daha sərfəli təklif gətirməyi tələb edəcək, ya da müqavilənin qarşılıqlı şəkildə ləğv olunmasına razılıq verəcək.

Qeyd edək ki, ''Qalatasaray'' birillik icarəyə görə ''Milan''a 6 milyon avro ödəməlidi. Bunun 3 milyonu ötən mövsümün ikinci dövrəsi, daha 3 milyonu yeni mövsümün birinci dövrəsi üçün nəzərdə tutulub. Yəni ''Qalatasaray'' Morata ilə bu yay vidalaşsa 3 milyon avro ödəməkdən qurtulacaq. Amma komanda gələn qış Moratanı daimi əsasda transfer etmək istəsə, ''Milan''a 6 milyon avrodan əlavə, 8 milyon avro da ödəməli olacaq.

Ötən yay İspaniya yığmasının kapitanı kimi Avropa Çempionatının qalibi olan Morata indiyə qədər ''Qalatasaray''da 16 rəsmi oyunda aktivinə 7 qol, 3 məhsuldar ötürmə yazıb.