‘'Qalatasaray''dan ayrılması gündəmdə olan Alvaro Morata ilə bağlı yeni xəbərlər var.

Məlum olduğu kimi tanınmış ispaniyalı forvard Türkiyə çempionunun heyətində qalmaq istəmir. O, həmyerlisi Fransesk Fabreqasın çalışdırdığı A seriyası təmsilçisi ''Komo''ya yollanmaq arzusundadı. Ancaq ''Tuttosport''un məlumatına görə Moratanın ''Komo''ya keçidində ''Qalatasaray'' üzündən problem yaranıb.

Belə ki, ''sarı-qırmızılar'' Viktor Osimhenin transferi tamamlanmayana qədər Moratanı əldən buraxmaq istəmir. İyulun 15-nə qədər xüsusi icazəli olan 32 yaşlı futbolçu artıq ''Qalatasaray''ın düşərgəsindədi və qeyd olunan tarixdən etibarən komanda ilə birlikdə məşqlərə çıxmağa başlayıb. Buna baxmayaraq Moratanın ''Komo''ya yollanmaq arzusu hələ də qüvvədədi. Onun menecerləri də rəhbərliyə bununla bağlı məlumat ötürüblər. Yəni Morata hazırda sadəcə müqavilə ilə bağlı olduğu üçün ''Qalatasaray''da bir növ məcburən məşqlərə çıxır.

Digər tərəfdən Moratanın ''Komo''ya transferinin hansı sxemlə reallaşacağı bəlli deyil. Çünki ''Qalatasaray'' qışda Moratanı birilliyə icarəyə götürüb və bunun qarşılığında ''Milan''a 6 milyon avro ödənilib. İndi futbolçunun 6 aydan sonra klubu tərk etmək durumu yarandığından ''Cim-Bom'' da haqlı olaraq 6 milyon avronun yarısını, yəni 3 milyon avronu geri istəyir. Bu baxımdan ''Qalatasaray''la ''Milan'' arasında danışıqlar davam edir.

Ona görə də indi bu futbolçunun yeni mövsümə hansı klubda başlayacağı heç kimə, hətta onun özünə də bəlli deyil. Xatırladaq ki, İspaniya yığması ilə Avropa Çempionluğunu qazanan Morata ''Qalatasaray''da 16 oyunda iştirak edərək aktivinə 7 qol, 3 məhsuldar ötürmə yazıb.