''Qalatasaray''ın qışda ''Milan''dan birillik icarəyə götürdüyü Alvaro Morata ilə bağlı sürpriz iddia ortaya atılıb.

Belə ki, təcrübəli forvardın icarə müddətinin bitməsini gözləmədən, yəni artıq bu yay ''Cim-Bom''dan ayrılacağı istisna edilmir. Bu məlumatı Portuqaliyanın ''A Bola'' nəşri paylaşıb. Mənbənin iddiasına görə tanınmış ispaniyalı forvard Türkiyədəki karyerasından o qədər də razı deyil.

Morata indiyə qədər ''sarı-qırmızılar''ın heyətində 10 rəsmi oyunda 581 dəqiqə şans qazanaraq aktivinə 3 qol, 1 məhsuldar ötürmə yazıb. Amma bu 3 qoldan 2-ni penaltidən vurub. O, nə Osimhenin yanında ikinci hücumçu kimi, nə də Osimhenin arxasında hücum qurucusu kimi ümidləri doğruldur. Tez-tez ehtiyatda qalan 32 yaşlı futbolçu hələ ki, kluba gözlənilən faydanı verə bilmir.

Özü də nəzərə alaq ki, yayda Mauro İkardi də zədəsini sağaldaraq məşqlərdə iştirak etməyə başlayacaq. Onun da sıraya qayıtmasından sonra Morata faktiki olaraq Mişi Batşuayi kimi 3-cü hücumçu statusunda olacaq. Bu futbolçunun son olaraq ''Konyaspor''a qarşı ölkə kubokunun yarımfinal matçında iştirak ərizəsinə salınmaması diqqət çəkdi. Bütün bu məqamları nəzərə aldıqda ispaniyalının yayda ''Milan''a dönməsi həqiqətən də sürpriz olmayacaq.

Qeyd edək ki, Türkiyə çempionu qışda Moratanın birilliyə icarəyə götürüldüyünü və bunun qarşılığında ''Milan''a 6 milyon avro ödəniləcəyini açıqlamışdı. ''Qalatasaray'' bu məsələdə də ziyanın yarısından dönməyə və 3 milyon avroya qənaət etməyə çalışacaq.