Bu gün “Levski” ilə qarşılaşacaq “Sabah” istisna olmaqla Misli premyer-liqasının qalan iştirakçıları artıq vətəndədi. Toplanışı ölkə xaricində keçənlərdən “Neftçi” ilə “Turan Tovuz” da qayıdıb. Maraqlıdı ki, “ağ-qaralar” Polşada, “bozqurd” isə Türkiyədə qələbəyə həsrət qaldı.

Bizdə olan bilgiyə görə, mövsümlərarası yoldaşlıq oyunları da bitib. Daha dəqiqi, bu silsilədən sonuncu yoxlama oyunları bu gün keçiriləcək. Saat 18.00-da "Karvan-Yevlax" "Mingəçevir"lə, saat 18.30-da isə "Qəbələ" “Sumqayıt”la qarşılaşacaq.

Əslində, avqustun 9-da "Şamaxı" ilə "İmişli" də qarşılaşmalıydı. Lakin Aran təmsilçisinin baş məşqçisi Xorxe Kaskilya bu oyunun keçirilməsini istəməyib.

Xatırladaq ki, yeni futbol mövsümü avqustun 15-də start götürəcək.

MÜZƏFFƏR QULUZADƏ