Bütün diqqətini transferlərə yönəldən ''Qalatasaray''la bağlı bu dəfə fərqli bir xəbər var.

İstanbul nəhəngi nə qədər çalışsa da, Tete məsələsində cəzadan canını qurtara bilməyib. ''Cim-Bom'' 1 milyon avroluq cəzaya məhkum edilib.

Braziliyalı Tete məlum olduğu kimi 2023-ün yayında ''Şaxtyor''dan ayrılmış və sərbəst futbolçu statusunda ''Qalatasaray''a gəlmişdi. Həmin vaxt FİFA iki ölkə arasındakı müharibəni nəzərə alaraq, Rusiya və Ukraynada çıxış edən əcnəbi futbolçulara müəyyən vaxta qədər öz klubları ilə müqaviləni birtərəfli qaydada ləğv etmək hüququ vermişdi. Tete də məhz bu hüquqdan yararlanmışdı. Amma ''Şaxtyor'' Tetenin bunun üçün müəyyən edilmiş zaman bitdikdən sonra müqaviləni ləğv etdiyini əsas gətirərək həm futbolçudan, həm də ''Qalatasaray''dan FİFA-ya şikayət etmişdi. Qurumun Problemli Məsələlərin Həlli üzrə Komitəsi bu şikayətin haqlı olduğuna və ''Şaxtyor''a 2,3 milyon avro təzminat ödənilməli olduğuna qərar vermişdi. ''Qalatasaray'' isə bununla razılaşmayaraq məsələni İdman Arbitraj Məhkəməsinə (CAS) daşımışdı. Məhz bu məhkəmənin qərarı ilə ''sarı-qırmızılar'' hazırda Arda Turanın çalışdırdığı ''Şaxtyor''a 1 milyon avro təzminat ödəyəcəklər.

Qeyd edək ki, hazırda ''Panatinaikos''da forma geyən 25 yaşlı Tete 2023/24-də ''Qalatasaray''da 45 rəsmi oyunda aktivinə yalnız 3 qol, 6 məhsuldar ötürmə yaza bilmişdi. Ötən yay ''sambaçı'' 4,75 milyon avroya Yunanıstan nəhənginə satılmışdı.