Sinner Alkarasdan “Rolan Qarros”dakı məğlubiyyətin qisasını aldı
71 milyon 630 min dollar mükafat fonduna malik London turnirinə yekun vuruldu.
"Football-plus.az" xəbər verir ki, qadınların turnirində final oyunu keçirildi. Amma İqa Sventeklə Amanda Anisimovanın duelində heç bir inriqa yaşanmadı.
Polşalı tennisçi cəmi 57 dəqiqə davam edən görüçdə rəqibə bir qeym də vermədi. Karyerasında ilk dəfə “Böyük dəbilqə” turnirində finalda oynayan Amerika təmsilçisi Sventekə müqavimət göstərə bilmədi. Polşalı karyerasında ilk dəfə “Uimbldon”un, 6-cı dəfə “Böyük dəbilqə” turnirlərinin qalibi oldu. O, əvvəllər 4 dəfə Fransa (2020, 2022, 2023, 2024), 1 dəfə isə ABŞ Açıq Çempionatında (2022) qələbə qazanıb.
Kişilər arasında turnirdə də final oyunu keçirildi. Dünya reytinqinin 1 nömrəsi Yannik Sinner 2 nömrə Karlos Alkarasın müqavimətini 3 saat 6 dəqiqə ərzində qırdı. Karyerasında ilk dəfə “Uimbldon”un qalibi olan 23 yaşlı italiyalı tennisçi bu il “Rolan Qarros”un finalında ispaniyalıdan aldığı məğlubiyyətin əvəzini çıxa bildi. Sinnerin buna qədər iki dəfə (2024, 2025) Avstraliya Açıq Çempionatının, bir dəfə (2024) isə “US Open”in qalibi olduğunu da xatırladaq. Ümumiyyətlə, italiyalı ulduz fərdi hesabda ATP səviyyəli 20 yarışda qalib gəlib. 22 yaşlı Alkaras ATP səviyyəli 21 turnirin qalibidi. Onun indiyə qədər “Böyük dəbilqə” seriyalı 5 turnirdə rəqib tanımadığını da xatırladaq.
Reaksiyalar
İqa Sventek:
“Düzünə qalsa, bunu heç arzulamırdım da. Özümü təcrübəli oyunçu sayıram, artıq “Dəbilqə” turnirlərini qazanmışam, ancaq bu uğuru gözləmirdim. Komandam sağ olsun, onlar mənə özümdən çox inanırdı. Bu il bizə qoşulan məşqçimə də təşəkkür etmək istəyirəm. Eniş-yoxuşlar oldu, ancaq sonda çalışmalarımız bəhrə verdi”.
Amanda Anisimova:
“Əsəbləşirdim ki, bunda da qəribə heç nə yoxdu. Dünən məşq edə bilmədim. Düşünürəm ki, sadəcə, çox yorulmuşam. Hətta səhərki isinmə hərəkətlərində də bu hiss olunurdu. Çoxlu fasilə verməli oldum. Hesab edirəm ki, “Böyük dəbilqə” turnirlərinin ikihəftəlik gərginliyinə dözmək üçün fiziki formam üzərində daha çox çalışmalıyam. Bu isə asan vəzifə deyil. Bir çox məsələdə mükəmməlləşməliyəm. Bu turnir həyəcanın öhdəsindən necə gəlməklə bağlı mənə təcrübə qazandırdı. Ən azı indi belə təcrübəm var”.
Yannik Sinner: “Parisdə çox ağır məğlubiyyətlə üzləşmişdm, odu ki, indi emosiyalarım aşıb-daşır. Ancaq son nəticədə qalib gəlmək və ya uduzmaq önəmli deyil. Sadəcə, nəyi doğru etmədiyini anlamaq və bunun üzərində işləmək lazımdı. Məhz belə də etdik. “Rolan Qarros”dakı məğlubiyyəti qəbul edərək işləmək yolunu tutduq. İndi kuboku əlimdə tutmağımın səbəblərindən biri budu. Sağlam, yaxşı adamların əhatəsində olduğuma görə Tanrıya minnətdaram. Bu titul mənim üçün çox şey deməkdi”.
Karlos Alkaras: “Məğlubiyyət heç vaxt xoş deyil. Xüsusən də finaldakı məğlubiyyət. Ancaq ümumilikdə bu iki həftə ərzində ot örtükdə etdiklərimlə qürur duyuram. Kortu başıuca tərk etdim. Ona görə ki, bu gün əlimdən gələni əsirgəmədim. Sadəcə, qeyri-adi oyun göstərən rəqibə qarşı oynadım. Məğlubiyyətə görə bir qədər kədərliyəm, ancaq həm də başıuca”.
final
Kişilər, fərdi
Sinner (İtaliya, 1) - Alkaras (İspaniya, 2) 4:6, 6:4, 6:4, 6:4
Cütlərin yarışı
Keş/Qlasspul (B.Britaniya, 5) – Xidzikata/Pel (Avstraliya/Niderland) 6:2, 7:6 (7:3)
Qadınlar, fərdi
Sventek (Polşa, 8) - Anisimova (ABŞ, 13) 6:0, 6:0
Cütlərin yarışı
Kudermetova/Mertens (Rusiya/Belçika, 8) – Suvey/Ostapenko (Çin Taybeyi/Latviya) 3:6, 6:2, 6:4
Mikst
Sinyakova/Verbek (Çexiya/Niderland) – Stefani/Solsberi (Braziliya/B.Britaniya) 7:6 (7:3), 7:6 (7:3)
Digər xəbərlər
