İlin 2-ci “Böyük dəbilqə” turniri başa çatdı.

Fransa Açıq Çempionatında qadınların turnirində finalçıların müəyyənləşdiyini xəbər vermişdik. İyunun 7-də həlledici oyun keçirildi. Reytinqin ilk iki pilləsində qərarlaşan Arina Sobolenko ilə Kori Qauffin duelindən kimin qalib ayrılacağını demək çətin idi. İş ondadı ki, belaruslu və amerikalı xanımlar indiyə qədər 10 dəfə qarşılaşmışdı, bərabərlik var idi – 5:5. Bu dəfə Qauff ilk setdə məğlub olsa da, sonrakı iki setdə inamlı qələbə qazandı. 21 yaşlı amerikalı “Rolan Qarros”da ilk, “Böyük dəbilqə” turnirlərində 2-ci qələbəsini (US Open-2023-də də qalib olub) qazandı.

Kişilərin turnirində yarımfinallardan biri daha böyük maraq doğururdu. Yannik Sinner Novak Cokoviçi məğlub etməklə karyerasında ilk dəfə “Rolan Qarros”da finala çıxdı. Serbiyalı ulduz isə hisslərini belə dilə gətirdi:

Sinner tarixə həm də son 15 ildə Cokoviçi ardıcıl 4 oyunda məğlub edən ilk tennisçi kimi düşdü. Sonuncu dəfə bunu 2008-09-cu illərdə Jo-Vilfrid Sonqa bacarmışdı.

Sinner finalda ispan tennisinin yeni ulduzu Karlos Alkarasla qarşılaşdı. Alkaras 5 saat 29 dəqiqə davam edən mübarizə sonucunda dünya reytinqinin 1 nömrəsinin öhdəsindən gəldi - 4:6, 6:7 (4:7), 6:4, 7:6 (7:3), 7:6 (10:2). “Rolan Qarros”da indiyi qədər belə uzun sürən final olmamışdı. Ümumilikdə “Böyük dəbilqə” turnirlərinə gəlincə, yalnız 2012-ci ildə keçirilən Avstraliya Açıq Çempionatında Novak Cokoviçlə Rafael Nadal bundan da uzun müddət – 5 saat 53 dəqiqə mübarizə aparıb. Alkaras – Sinner dueli Daniil Medvedevlə Nadal arasında 2022-ci ildə “Australian Open”in finalında keçirilən görüşü (5 saat 24 dəqiqə) bu göstəricidə 2-ci pillədən sıxışdırdı. Daha bir maraqlı məqam: Sinner indiyə qədər 4 saatdan artıq davam edən 6 görüşün iştirakçısı olub və hamısında uduzub.

22 yaşlı Alkaras karyerasında 5-ci dəfə “Böyük dəbilqə”nin finalında oynadı və yenə qələbə qazandı. O, son iki “Rolan Qarros”la yanaşı, “US Open”in (2022) və “Uimbldon”un (2023, 2024) da qalibi olub. Alkaras artıq ATP səviyyəli 20 turnirdə qalib gəlib.

23 yaşlı Sinner isə karyerasında ilk dəfə “Böyük dəbilqə”nin finalında uduzdu. İtaliyalı ulduz indiyə qədər iki dəfə (2024, 2025) “Australian Open”, bir dəfə “US Open”i (2024) qazanıb.

Bir maraqlı statistikanı da xatırlatmağa dəyər. Son 8 “Böyük dəbilqə” turnirini yalnız üç tennisçi qazanıb. “Uimbldon-2023”dən bəri Alakarasın 4, Sinnerin 3 titulu var. Bu müddətdə bir də Cokoviç (US Open-2023) qələbəyə sevinib.

Kişilər
yarımfinal
Alkaras (İspaniya, 2) - Muzetti (İtaliya, 8) 4:6, 7:6 (7:3), 6:0, 2:0 imtina
Sinner (İtaliya, 1) - Cokoviç (Serbiya, 6) 6:4, 7:5, 7:6 (7:3)

final
Alkaras (İspaniya, 2) - Sinner (İtaliya, 1) 4:6, 6:7 (4:7), 6:4, 7:6 (7:3), 7:6 (10:2)

cütlərin yarışı
Qranolyers/Sebalyos (İspaniya/Argentina, 5) – Solsberi/Skupski (B.Britaniya) 6:0, 6:7 (5:7), 7:5

Qadınlar
final
Qauff (ABŞ, 2) - Sobolenko (Belarus, 1) 6:7 (5:7), 6:2, 6:4

cütlərin yarışı
Errani/Paolini (İtaliya, 2) - Danilina/Kruniç (Qazaxıstan/Serbiya) 6:4, 2:6, 6:1