Şotlandiya çempionatının 2024/25 mövsümü çempionluq yarışında rəqabətin əhəmiyyətli dərəcədə zəifləməsi ilə yadda qaldı.

"Football-plus.az" xəbər verir ki, “Reyncers” dörd ildən sonra titulu geri qaytarmaq üçün çox çalışdı, lakin əzəli rəqibi “Seltik”in böyük qüdrəti qarşısında növbəti dəfə aciz qaldı.

Şərikli rekordçu
Əvvəlki üç mövsümdə çempion olan “Seltik”in titulu qorumaq şansı yüksək dəyərləndirilirdi. “Keltlər” heyətinə görə “Reyncers”i açıq-aşkar üstələyirdilər. Əvvəlki mövsüm ərəfəsində 4 ildən sonra Şotlandiyanın paytaxtına geri çağırılan Brendan Rocersin sərəncamında geniş heyət vardı. Futbolçuların yarıdan çoxunun çempionluq təcrübəsinə malik olması “yaşıl-ağlar” üçün daha bir üstünlük sayılırdı. Nəticə elə gözlənildiyi kimi oldu: ardıcıl 4-cü dəfə Şotlandiyanın ən güclüsü olan “Seltik” son 14 mövsümdə 13-cü (!) çempionluğunu qazandı. Diqqəti cəlb edən əsas fakt isə “zolaqlılar”ın tarixində 55-ci çempionluğunu rəsmiləşdirməklə “Reyncers”in rekordunu təkrarlamaları oldu!

Qeyd edək ki, Rocers komandanı daha əvvəl də uğurla çalışdırmışdı. 2016-19-cu illərdə “Seltik” ilə iki çempionluq, üç ölkə və üç Liqa kubokunu qazanan şimali irlandiyalı mütəxəssis bu titulların üzərinə üzərinə son iki mövsümdə daha iki çempionluq, bir ölkə və iki Liqa kubokunu əlavə etdi. Rocersin komandası son mövsümün 33 turluq birinci mərhələsini “Reyncers”dən 15 (!) xal öndə başa vurdu. Həlledici mərhələdə də gücünə şübhə yeri qoymayan “yaşıl-ağlar” çempionatı 92 xalla bitirdilər.

“Seltik” ən çox (112) qol vuran və ən az (26) top buraxan komanda oldu. Rocersin komandası Şotlandiyada daha bir kubok qazandı. “Zolaqlılar” Liqa kubokunun finalında əzəli rəqibi “Reyncers”i əsas və əlavə vaxtı 3:3 nəticələnən matçdan sonrakı penalti seriyasında (5:4) məğlub edərək mövsümü “dubl” ilə başa vurdular!

Maraq doğuran digər fakt kimi Ceyms Forrestin “Seltik”in tarixinə ən titullu oyunçu kimi düşdüyünü də qeyd edək. Komandada 2010-cu ilin mayında debüt edən 34 yaşlı yarımmüdafiəçi indiyədək ölkə çempionatının 336 oyununda meydana çıxıb. O, bu göstəriciyə əsasən klubun ilk “10-luğ”una belə düşməsə də, “keltlər”lə 26 titula sahib çıxmaqla adını rekorda yazdı! 13 dəfə çempion olan Ceyms “Seltik”in formasında ardıcıl 16 mövsüm qol vurmaqla Cimmi Makqrori ilə Pol Maksteyə məxsus rekordu da təkrarladı!

Qeyri-sabit “Reyncers”
“Seltik” ilk turlardan titulu qorumaq iqtidarında olduğunu göstərdi. Amma bu da var ki, Qlazqo derbilərində ümumilikdə “Reyncers”dən geri qaldı. Paytaxt nəhəngləri arasında baş tutan və “Köhnə firma” adlandırılan 4 oyundan ikisi “göylər”in qələbəsi ilə nəticələndi. Mövsümün əvvəlində “Reyncers”in qapısından üç cavabsız top keçirən “keltlər” sonrakı oyunlarda 0:3 və 2:3 hesabıyla uduzdular, bir matç isə 1:1 hesablı heç-heçə ilə nəticələndi.

Derbilərdə üstünlük “Reyncers”in tərəfində olsa da, ölkənin 55 qat çempionu mövsümü əvvəldən axıra qədər qeyri-sabit keçirdi. Nəticədə Filipp Klemanın baş məşqçi vəzifəsindəki fəaliyyəti bu ilin fevralına qədər çəkdi. “Brügge” və “Monako”dakı fəaliyyəti ilə tanınan belçikalının yerinə təyin olunan Barri Ferqyusonun məşçilik təcrübəsi yox idi. Buna baxmayaraq, rəhbərlik vaxtilə “Reyncers”də futbolçu kimi çıxış edən sabiq yarımmüdafiəçiyə komandaya mövsümün sonuna qədər başçılıq etmək fürsəti yaratdı. Gözlənildiyi kimi, “göylər” premyer-liqanı 2-ci yerdə başa vuraraq Çempionlar Liqasına (ÇL) vəsiqə ilə təsəlli tapdılar. Qlazqo nəhənginin mövsümü titulsuz bitirməsini isə xüsusi vurğulayaq.

Qəribə “Aberdin”
Əslində mövsümün əvvəli çox maraqlı alınmışdı. Təəccüb doğuran fakt “Seltik”in ilk 10 turda vahid deyil, şərikli lider mövqeyində olması idi. Amma ölkə nəhəngi kimi 28 xal toplayan “Reyncers” yox, “Aberdin” idi. Gənc norveçli Cimmi Telinin çalışdırdığı komandanın yeganə büdrəməsi “Seltik” ilə səfər oyununda (2:2) baş verdi. Aberdinlilər yekun cədvəldə “Reyncers”i qabaqlayıb ÇL-ə vəsiqə qazanacaqlarına ümid edirdilər. Lakin Telinin komandası 10-cu turdan sonra eniş yaşamağa başladı. Bu enişi həm də “Hibernian”ın inanılmaz yüksəlişi şərtləndirdi. Nəticədə “Aberdin” mövsümü 5-ci, “Hibernian” isə 3-cü yerdə başa vurdu. Amma aberdinlilər hər halda 35 ildən sonra ölkə kubokunu qazanmağa nail oldular.