Şotlandiya çempionatının 2022/23 mövsümü çempionluq yarışında intriqanın ümumilikdə zəif olması ilə yadda qaldı.

"Football-plus.az" xəbər verir ki, “Reyncers” titulu geri qaytarmaq üçün çox çalışdı, lakin qüdrətini daha da artıran “Seltik” azarkeşlərinə növbəti böyük bayram yaşatdı.

“Seltik” Şotlandiyada kubok qoymadı

2021/22 mövsümündə əzəli rəqibi “Reyncers”dən 4 xal çox toplamaqla çempion olan “Seltik”in Angelos Postekoğlunun başçılığı altında keçirdiyi son mövsüm daha uğurlu alındı. Xatırladaq ki, rəhbərliyin onu baş məşqçi vəzifəsinə təyin etməsi yerli publikada böyük təəccüblə qarşılanmışdı. Avstraliyalı mütəxəssisin üç il yarım ərzində “Yokohama F.Marinos”u Yaponiya çempionatında qələbəyə və ölkə kubokunun finalına daşıması Şotlandiyada ciddi uğur sayılmırdı. Lakin 57 yaşlı çalışdırıcı əzəli rəqib “Reyncers”in qələbə yürüşünü dayandırmaqla “ağzıgöyçəklər”i susdurmuşdu.

Onun komandasının son mövsümdə daha güclü olduğu ilk turlardan hiss olunurdu. “Yaşıl-ağlar”ın mövsümün birinci mərhələsini birnəfəsə keçdiklərini əminliklə söyləmək olar. “Seltik” 33 turluq marafonda ən güclü hücuma (103) və ən güclü müdafiəyə (25) malik komanda kimi yadda qaldı. “Zolaqlılar” premyer-liqanın bu mərhələsində 30 qələbə, 2 heç-heçə və yalnız 1 məğlubiyyətlə nəticədə 92 xal toplayaraq 1-ci oldular. Postekoğlunun komandası 5 turluq mükafatlar uğrunda mübarizədə yalnız 7 xal qazansa da, 53-cü dəfə Şotlandiya çempionu oldu. Çempionatı 114 qol vurmaqla bitirən “yaşıl-ağlar” mövsüm ərzində bir sıra müsbət seriyalarla yadda qaldılar. Belə ki, onlar ən uzun - 12 oyunluq qələbə və 27 oyunluq məğlubiyyətsiz seriyaları ilə fanatlarını sevindirdilər.

Doğrudu, qitə arenasında da uğurlu çıxış etmək “zolaqlılar”a müyəssər olmadı. Qlazqo klubu Çempionlar Liqasının qrupunda “Real”, “Leyptsiq” və “Şaxtyor”a qarşı keçirdiyi 6 matçda yalnız 2 xal qazanmaqla sonuncu yeri tutdu. Bu nəticə ilə avrokubok macərası qısa çəkən komandanın diqqəti daxili yarışlara ayırması üçün əlverişli şərait yarandı. Və Postekoğlunun komandası Şotlandiyada kubok qoymadı. “Zolaqlılar” fevralın 26-da finalda “Reyncers”i 2:1 hesabıyla məğlub edərək Liqa kubokunu qazandılar. İyunun 3-də isə onlar üçün tarixi məqam baş verdi. Həmin gün “İnverness”ə 3:1 hesabı ilə qalib gələn çempion ölkə kubokuna da yiyələndi. Beləliklə, “Seltik” tarixində 8-ci dəfə daxili “trebl” etdi!

Van Bronkhorstun “Reyncers” macərası bir il çəkdi

2020/21 mövsümündə “Reyncers”i 102 xalla çempionluğa daşıyan Stiven Cerrardın vətəni İngiltərədən aldığı təklifi qəbul etməsi komandaya təsirsiz ötüşməmişdi: 43 yaşlı mütəxəssisin “Aston Villa”nın başına keçməsi sonda “göylər”in titulu itirməsinə səbəb olmuşdu. Rəhbərliyin hələ 2021-ci ilin noyabrında Cerrardın yerinə baş məşqçi təyin etdiyi Covanni van Bronkhorsta ümidi az deyildi. Niderlandlı mütəxəssis, hər halda, 2021/22 mövsümünü əzəli rəqibdən bir qədər geri qalmaqla başa vurmuş və çempionluq yarışında intriqanın həlledici mərhələyə qədər qorunmasına nail olmuşdu. Onun komandanı Avropa Liqasının finalına (komanda Frankfurt “Ayntraxt”ına əsas və əlavə vaxtı 1:1 hesabı ilə başa çatan həlledici matçdan sonrakı penalti seriyasında uduzmuşdu) çıxarması da ümidləri artırmışdı.

Lakin “Reyncers” növbəti mövsümdə azarkeşlərinin ümidini doğrulda bilmədi. Əslində komanda mövsümə çox yaxşı başlamışdı: ilk 5 turda 4 qələbə və 1 heç-heçəyə nail olan “göylər” lider “Seltik”dən yalnız 2 xal geri qalırdılar. 6-cı turun sentyabrın 3-də keçirilən oyunu Van Bronkhorstun komandası üçün faciəvi nəticələndi: çempion əzəli rəqibinin qapısından 4 cavabsız top keçirdi. Və futbol ictimaiyyətində bu “Reyncers”in ən yüksək titula iddia edə bilməyəcəyi düşüncəsi formalaşdı. İş elə gətirdi ki, rəhbərlik noyabrda Van Bronkhorstla vidalaşmağı lazım bildi. Başqa sözlə, onun Qlazqo macərası düz bir il çəkdi. Niderlandlının yerinə təyinat alan Maykl Bilin əvvəlki iş yeri “Kuinz Park Reyncers” olmuşdu. 42 yaşlı mütəxəssis komandada yaxşı mənada dönüşə nail ola bilmədi. Heç kim çempionatın birinci mərhələsinini “Seltik”dən 13 xal geri qalmaqla 2-ci yerdə başa vuran “Reyncers”dən möcüzə gözləmirdi. Belə də oldu: komanda yekun cədvəldə əzəli rəqibdən 7 xal geri qaldı. “Seltik”ə Liqa kubokunun finalında uduzan ölkə nəhəngi mövsümü titulsuz başa vurdu. Finişə 3 tur qalmış evdə çempionun qapısından üç cavabsız top keçirmək “göylər” üçün kiçik təsəlli oldu...

“Dandi Yunayted” getdi, “Dandi” gəldi
Mövsümün uğursuzu “Dandi Yunayted” oldu. Bu komanda çempionşipə düşdü. “Dandi” isə birillik fasilədən sonra yenidən premyer-liqada çıxış edəcək.